کولگام تصادم کے دوران 6 ملی ٹینٹ ہلاک، آپریشن ہنوز جاری

سری نگر: ڈائریکٹر جنرل آف پولیس جموں و کشمیر آر آر سوین کا کہنا ہے کہ جنوبی ضلع کولگام میں دو الگ الگ مقامات پر ہونے والی تصادم آرائیوں کے دوران چھ ملی ٹینٹ ہلاک ہوئے ہیں جبکہ ایک جگہ آپریشن ہنوز جاری ہے۔ انہوں نے کہا کہ ملی ٹنسی کے خلاف جنگ میں مقامی لوگ سیکورٹی ایجنسیوں کو اپنا بھر پور تعاون فراہم کر رہے ہیں۔

ان باتوں کا اظہار موصوف نے سری نگر میں نامہ نگاروں سے بات چیت کے دوران کیا۔ انہوں نے کہا کہ جنوبی ضلع کولگام میں دو مقامات پر جاری تصادم آرائیوں میں 6 ملی ٹینٹ مارے گئے ہیں۔ ڈی جی پی نے کہا کہ علاقے میں آپریشن جاری ہے کیونکہ مزید ملی ٹینٹوں کی موجودگی کو خارج از امکان قرار نہیں دیا جا سکتا۔

انہوں نے بتایا کہ چینی گام اور موٹر گام میں تصادم کی جگہ چھ ملی ٹینٹوں کی لاش برآمد کی گئی ہیں اور اب ان کی شناخت اور تنظیمی وابستگی کے بارے میں جانچ پڑتال جاری ہے۔ پولیس سربراہ نے کہا کہ تصادم آرائی کے دوران فوج کے دو جوان بھی جاں بحق ہوئے ہیں۔ انہوں نے کہا کہ آپریشن مکمل ہونے کے بعد اس ضمن میں مزید جانکاری فراہم کی جائے گی۔

آر آر سوین نے کہا کہ کولگام میں کامیاب آپریشن اور لوگوں کی حمایت سے یہ عیاں ہے کہ ملی ٹنسی کے خلاف لڑائی بہت جلد منطقی انجام تک پہنچے گی۔ جموں صوبے کی سیکورٹی صورتحال کے بارے میں پوچھے گئے سوال کے جواب میں پولیس سربراہ نے کہا کہ گر چہ خطے میں ملی ٹنسی کو پھر سے بحال کرنے کی کوششیں کی جا رہی ہیں تاہم ملک دشمن عناصر کو ایسا کرنے کی اجازت نہیں دی جائے گی۔

ان کا مزید کہنا تھا کہ جموں صوبے میں سرگرم ملی ٹینٹوں اور ان کے مدد گاروں کے خلاف چلائے جارہے آپریشنز کامیابی سے ہمکنار ہو رہے ہیں۔ اس سے قبل پولیس سربراہ نے بادامی باغ سری نگر میں تعزیتی گلباری تقریب میں شرکت کی ۔ انہوں نے کولگام تصادم میں جاں بحق ہوئے فوجی اہلکاروں کو شاندار الفاظ میں خراج عقیدت پیش کیا۔