پاکستانی سرحد سے دراندازی کر رہے لشکر طیبہ کے 5 دہشت گرد ہلاک، سیکورٹی فورسز کو ملی بڑی کامیابی

جموں و کشمیر کے کپواڑہ ضلع واقع ماچھل سیکٹر میں 26 اکتوبر کو سیکورٹی فورسز نے دہشت گردوں کی دراندازی کی بڑی کوشش کو ناکام کر دیا۔ لائن آف کنٹرول پر سیکورٹی فورسز نے ایک بڑی مہم چلا کر لشکر طیبہ کے 5 دہشت گردوں کو ہلاک کر دیا۔ جموں و کشمیر پولیس نے اس سلسلے میں جانکاری دیتے ہوئے بتایا کہ علاقہ میں اب بھی تلاشی مہم جاری ہے۔

جموں و کشمیر پولیس کا کہنا ہے کہ آج صبح ماچھل سیکٹر میں پولیس کے ایک اسپیشل اِنپٹ کی بنیاد پر فوج کے ساتھ مشترکہ مہم شروع کی گئی تھی۔ ذرائع نے جموں و کشمیر پولیس کو دہشت گردوں کے ایک گروپ کی طرف سے علاقہ میں ممکنہ دراندازی کی کوشش کے بارے میں مطلع کیا تھا۔ جیسے ہی دراندازی کرنے والے گروپ کو سرحد کی باڑ کے پاس الرٹ سپاہیوں کی طرف سے ٹریک کیا گیا اور چیلنج پیش کیا گیا تو دہشت گردوں نے جوانوں پر گولی باری شروع کر دی۔ اس کے بعد تصادم شروع ہو گیا۔

میڈیا رپورٹس کے مطابق ابتدائی گولی باری میں دو درانداز مارے گئے تھے اور دیگر دراندازوں نے پیچیدہ علاقہ کا فائدہ اٹھاتے ہوئے خود کو بچانے کی کوشش کی۔ آخر کار 6 گھنٹے طویل آپریشن کے بعد 3 مزید دہشت گردوں کو سیکورٹی فورسز نے ہلاک کر دیا۔

جموں و کشمیر پولیس نے سوشل میڈیا پلیٹ فارم ’ایکس‘ پر جانکاری دی ہے کہ لشکر طیبہ کے 3 مزید دہشت گرد مارے گئے ہیں جس سے ان کی مجموعی تعداد 5 ہو گئی ہے۔ ان سبھی دہشت گردوں کی شناخت یقینی کی جا رہی ہے۔