یونین ٹریٹری سے تعلق رکھنے والے طلبا کے 5 ہیلپ لائن نمبر جاری

سری نگر: جموں و کشمیر اسٹوڈنٹس ایسو سی ایشن (جے کے ایس اے) نے ملک کے مختلف حصوں میں زیر تعلیم جموں وکشمیر اور لداخ یونین ٹریٹریوں سے تعلق رکھنے والے طلبا کے مسائل کے لئے مزید پانچ ہیلپ لائن نمبرس جاری کئے ہیں۔ ایسو سی ایشن کے ترجمان ناصر کھیو یہامی نے جمعہ کے روز اپنے ایک بیان میں کہا کہ جموں و کشمیر اور لداخ یونین ٹریٹری کے طلبا کو ملک کے کسی بھی حصے میں کالج کیمپسس و دیگر مسائل و مشکلات کے حل کے لئے پانچ ہیلپ لائن نمبرس جاری کئے گئے ہیں جن پر وہ کال کر سکتے ہیں تاکہ ان کے مسائل کو حل کیا جاسکے۔ انہوں نے کہا کہ ان طلبا کے لئے ہم نے مزید پانچ ہیلپ لائن نمبرس جاری کئے ہیں۔

موصوف ترجمان نے کہا کہ ایسو سی ایشن نے یہ اقدام جموں وکشمیر اور لداخ یونین ٹریٹریوں کے طلبا کی سہولیات کے لئے اٹھایا ہے۔ انہوں نے کہا کہ طلبا ان نمبرات کی وساطت سے اپنی شکایات و دیگر مشکلات کو ہم تک پہنچا سکتے ہیں تاکہ ہم اعلیٰ حکام کے ساتھ مل کر ان کا بر وقت اور موثر سدباب تلاش کر سکیں۔ ان کا کہنا تھا کہ طلبا کے لئے ملک بھر میں یہ ہیلپ لائن نمبرات چوبیس گھنٹے دستیاب رہیں گے۔

کھیو یہامی نے کہا کہ سال رواں کے ماہ جون میں ایک مخصوص ٹول فری نمبر، جس کے ذریعے لگ بھگ ایک سو رضا کار طلبا کی مدد کر رہے ہیں، کے علاوہ مزید پانچ مخصوص رضا کار طلبا، جن کو کوئی سیکورٹی یا کوئی دوسرا مسئلہ در پیش ہو، کی مدد کریں گے۔ انہوں نے کہا کہ یہ رضا کار طلبا کو داخلہ لینے وغیرہ میں بھی دست تعاون پیش رکھیں گے۔

ایسو سی ایشن کے کوواڈینیٹر عمر جمال نے کہا کہ یہ ہیلپ نمبرس خاص طور پر ملک کے مختلف حصوں میں زیر تعلیم کشمیری طلبا کے لئے جاری کئے گئے ہیں۔ انہوں نے کہا کہ کشمیر میں ہونے والی حالیہ شہری ہلاکتوں اور دوسرے نا مساعد حالات کے پیش نظر ملک کے مختلف حصوں میں زیر تعلیم کشمیری طلبا کو پریشانیاں لاحق ہوگئی ہیں لہذا ان ہیلپ لائن نمبرات کا جاری کرنا وقت کی اہم ترین ضرورت تھی۔ انہوں نے جیو نیٹ ورک کا تعاون فراہم کرنے پر شکریہ ادا کیا۔