اتر پردیش میں گرمی سے 33 کی موت، بہار میں 128 سال پرانا ریکارڈ ٹوٹا
شمالی ہندوستان میں صبح سے ہی آسمان سے گرمی اور آگ برس رہی ہے۔ سورج مسلسل چمک رہا ہے اور شمالی ہندوستان کے کئی علاقوں میں درجہ حرارت 50 کے قریب پہنچ گیا۔
![<div class="paragraphs"><p>فائل تصویر آئی اے این ایس</p></div>](https://media.assettype.com/qaumiawaz%2F2024-06%2Fabd2736b-734a-4bd7-b995-3a07820c8417%2FPatna_Heat_and_Dust.jpg?rect=0%2C0%2C2026%2C1140&auto=format%2Ccompress&fmt=webp)
فائل تصویر آئی اے این ایس
شمالی ہندوستان میں گرمی کی لہر جاری ہے۔ درجہ حرارت ہر روز ریکارڈ توڑ رہا ہے۔ شمالی ہندوستان اور دہلی کے کئی علاقوں میں درجہ حرارت 50 ڈگری کے قریب پہنچ گیا ہے۔ اتر پردیش میں گرمی سے 33 لوگوں کی موت ہو گئی ہے۔ ڈاکٹرحضرات صبح 10 بجے سے شام 4 بجے تک گھر سے باہر نہ نکلنے کا مشورہ دے رہے ہیں۔ لیکن پیٹ کی آگ بجھانے کے لیے ملک کی ایک بڑی آبادی اس شدید گرمی میں گھروں سے باہر نکلنے پر مجبور ہے۔
یہ بھی پڑھیں : ملک بھر میں پرجوش انداز میں منائی جا رہی ہےعیدالاضحیٰ
جون شروع ہونے کے بعد سے ہی صبح سے آسمان سے گرمی اور آگ برس رہی ہے، سورج مسلسل چمک رہا ہے۔ ملک کی سب سے بڑی ریاست اتر پردیش اس کا سب سے بڑا اس کا شکار ہے جہاں گرمی نے 33 سے زائد افراد کی جان لے لی ہے۔ اس میں ہفتہ کو صرف کانپور اور بندیل کھنڈ میں 20 لوگوں کی موت ہو گئی۔ درجہ حرارت کی بات کریں تو کانپور میں 46.3 ڈگری، ہمیر پور میں 46.2 ڈگری، جھانسی میں 46.1 ڈگری، وارانسی میں 46 ڈگری، پریاگ راج میں 46 ڈگری اور آگرہ میں 45.5 ڈگری ریکارڈ کیا گیا ہے۔
بہار اپنی 128 سال کی موسمی تاریخ میں بدترین گرمی کا سامنا کر رہا ہے۔ پٹنہ میں گرمی کی لہر کا ایسا کہرام ہے کہ لوگ اپنے آپ کو گھروں تک محدود رکھنے پر مجبور ہیں۔ صبح 10 بجے کے ساتھ ہی سڑکوں پر کرفیو لگا ہوا ہے۔ ملک کی راجدھانی دہلی کو دوہرا جھٹکا لگ رہا ہے۔ ایک طرف گرمی کا عذاب ہے تو دوسری طرف پانی کی قلت ہے۔ دہلی کا حال یہ ہے کہ اس شدید گرمی میں لوگوں کو پانی کی تلاش میں کئی کلومیٹر دور جانا پڑ رہا ہے اور پھر بھی پانی نہیں مل رہا۔
دوسری جانب دہلی میں محکمہ موسمیات نے اگلے تین دنوں تک دہلی میں شدید گرمی اور ہیٹ ویو کا اورنج ایلرٹ جاری کیا ہے۔ اس کا مطلب ہے کہ گرمی سے راحت ملنے کی کوئی دور دور تک امید نہیں۔ صرف مانسون ہی دہلی کو اس شدید گرمی سے بچا سکتا ہے۔ لیکن 30 جون سے پہلے اس کی آمد کا کوئی امکان نہیں ہے۔
مانسون براہ راست جنوب سے شمال کی طرف نہیں بڑھ رہا ہے، فی الحال مانسون خلیج بنگال سے جنوبی گجرات، شمال مغربی گجرات، جنوبی اڈیشہ، وجے نگر کے راستے اسلام پور کی طرف بڑھ رہا ہے۔ ہمیں امید ہے کہ اگلے 4-5 دنوں میں مہاراشٹر، چھتیس گڑھ، اڈیشہ، بنگال، بہار، جھارکھنڈ کے کچھ علاقوں میں مانسون کے حالات پیدا ہوں گے۔مطلب بالکل واضح ہے۔ گرمی کی لہر اسی طرح جاری رہے گی۔ ایسی صورتحال میں احتیاط ہی بہترین علاج ہے۔ اگر ضروری ہو تو ہی گھر سے باہر نکلیں۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔