ٹاٹا اسٹیل میں 3000 لوگوں کی ملازمت خطرے میں، کمپنی پر سستی کا پڑ رہا منفی اثر

ہندوستان میں معاشی بحران اور بڑھتی بے روزگاری کی خبروں کے درمیان ٹاٹا اسٹیل سے بھی بری خبر سامنے آ رہی ہے۔ میڈیا ذرائع کے مطابق کمپنی اپنے یوروپ واقع دفتر سے کم و بیش 3000 لوگوں کو ملازمت سے نکالنے کا منصوبہ بنا رہی ہے۔ پیر کے روز کمپنی نے کہا کہ بازار میں کمزور طلب اور زیادہ خرچ کی وجہ سے کمپنی یہ قدم اٹھانے کے لیے مجبور ہے۔

میڈیا میں چل رہی خبروں کے مطابق ایک بیان میں ٹاٹا نے کہا ہے کہ وہ اپنے یوروپی دفاتر میں 3000 سے زائد ملازمین کی تعداد میں تخفیف کرنے اپنی کارکردگی میں بہتری لانا چاہتی ہے۔ ہندوستانی کمپنی ٹاٹا اسٹیل، جس نے اپنے یوروپی کاروبار کو مضبوط کرنے کے لیے جون میں ایک تبدیلی پروگرام شروع کیا تھا، جس میں کمپنی نے نیدرلینڈ اور ویلس میں اسٹیل بنانے کا کام شروع کیا تھا۔ اس قدم کے بعد اب ملازمتوں میں تخفیف کی بات لوگوں کے لیے پریشان کن ہے۔

خبر رساں ایجنسی رائٹرس کے ایک ذرائع کا اس سلسلے میں کہنا ہے کہ ٹاٹا گروپ کے یوروپی چیف ایگزیکٹیو افسر ہنرک ایڈم نے پہلے ہی بغیر اعداد و شمار پیش کیے کہا تھا کہ جلد کمپنی یوروپی تجارت میں ملازمت میں تخفیف کر سکتی ہے۔ اب ٹاٹا اسٹیل کی جانب سے نئی دہلی میں منعقد ایک ٹرائبل ڈائیلاگ پروگرام میں معیشت میں سستی کے اوپر پوچھے گئے سوال پر نریندرن نے کہا کہ ’’معیشت ٹھیک ہے۔ اس میں بہتری ہو رہی ہے۔ حکومت قدم اٹھا رہی ہے۔‘‘ حالانکہ انھوں نے کہا کہ ’’آٹو سیکٹر میں تھوڑی سستی ہے، لیکن دیگر سیکٹرس میں ہم اصلاح دیکھ رہے ہیں۔‘‘