’شیئر بازار میں 30 لاکھ کروڑ کا نقصان مودی اور امت شاہ کی وجہ سے ہوا‘، انڈیا الائنس کے وفد کا ’سیبی‘ سے جانچ کا مطالبہ

لوک سبھا انتخابات کے بعد ایگزٹ پول اور نتائج کے درمیان شیئر مارکیٹ میں زبردست اتار چڑھاؤ کے معاملے پر کانگریس سمیت دیگر اپوزیشن پارٹیاں مرکزی حکومت پر سخت حملہ آور ہیں۔ اس معاملے میں انڈیا الائنس کے ایک وفد نے نے سیکورٹیز اینڈ ایکسچینج بورڈ آف انڈیا ’سیبی‘ کے چیئرمین سے ملاقات کرتے ہوئے جانچ کا مطالبہ کیا ہے۔

انڈیا الائنس کے وفد نے سیبی کے چیئر مین مادھوی پوری سے ملاقات کی ہے۔ وفد کا کہنا ہے کہ ایگزٹ پول کے بعد شیئر مارکیٹ میں بڑا گھوٹالہ ہوا جو پی ایم مودی اور وزیر داخلہ امت شاہ کے میڈیا میں دیئے گیے بیان کی وجہ سے ہوا ہے۔ اس وفد میں شامل مہاراشٹر کے سابق وزیر اعلیٰ ادھو ٹھاکرے کی شیوسینا کے لیڈر اور رکن پارلیمنٹ اروند ساونت نے کہا کہ امت شاہ اور پی ایم مودی نے کہا کہ آپ شیئرز میں سرمایہ کاری کریں۔ دونوں نے 400 پار کا نعرہ لگایا اور اس طرح لوگوں نے پیسے لگا دیئے۔

وفد میں شامل ترنمول کانگریس  کے لیڈر کلیان بنرجی نے کہا کہ امت شاہ اور پی ایم مودی نے سرمایہ کاری کرنے کے لیے کہا، جس کے بعد 30 لاکھ کروڑ روپے کا نقصان ہوا ہے۔ یہ ایک بڑا گھوٹالہ ہے۔ ان لیڈروں کے علاوہ اس وفد میں ساکیت گوکھلے (ٹی ایم سی)، ساگریکا گھوش اور سپریا سولے سمیت اپوزیشن انڈیا الائنس کے کئی لیڈران موجود تھے۔

واضح رہے کہ حال ہی میں کانگریس لیڈر راہل گاندھی نے کہا تھا کہ ایگزٹ پول کی وجہ سے چھوٹے خوردہ سرمایہ کاروں کو اسٹاک مارکیٹ میں 30 لاکھ کروڑ روپے کا نقصان ہوا ہے۔ وزیراعظم، وزیر داخلہ اور وزیر خزانہ نے انتخابات کے وقت سرمایہ کاروں کو اسٹاک مارکیٹ میں پیسہ لگانے کا مشورہ دیا تھا۔ اس کی ایک مشترکہ پارلیمانی کمیٹی (جے پی سی) سے جانچ ہونی چاہیے۔