بہار: میلے میں بھگدڑ، کئی افراد کی موت

بیگو سرائے۔ بہار کے بیگوسرائے ضلع میں کارتک پورنما کے میلے کے دوران اسنان (غسل)کے موقع پر بھگدڑ مچ جانے سے 3 افراد کی موت ہو گئی ہے۔ اس حادثہ میں 10 افراد زخمی بھی ہوئے ہیں۔ کارتک پورنما کے موقع پر بیگو سرائے کے سمریا گھاٹ پر گنگا میں اسنان کرنے کے لئے بڑی تعداد میں لوگ جمع ہوتے ہیں۔

فی الحال انتظامیہ نے بچاؤ اور راحت کا کام شروع کر دیاہے۔ میڈیا میں چل رہی کچھ رپورٹوں کے مطابق 3 لوگوں کی موت تو کچھ کے مطابق 4 لوگوں کی موت واقع ہوئی ہے۔ جبکہ بیگو سرائے سے بی جے پی کے رکن پارلیمنٹ بھولا سنگھ نے ایک داروغہ سمیت 7 لوگوں کی موت کا دعویٰ کیا ہے۔ ان کے مطابق اس بھگدڑ کے لئے ضلع انتظامیہ اور ریاستی حکومت ذمہ دار ہے ۔ انہوں نے کہا کہ بغیر تیاری کے یہ میلہ منعقد کیا گیا ہے۔ بھولا سنگھ نے حادثے کی جانچ کرانے کا مطالبہ کیا ہے۔

چشم دیدوں کے مطابق اس حادثے کے لئے پولس ذمہ دار ہے کیوں کہ لاکھوں لوگوں کی بھیڑ جمع ہونے کے باوجود وہاں حفاظت کا کوئی معقول انتظام نہیں تھا۔

بیگو سرائے کے ڈی ایم کے مطابق 75 سال سے زیادہ کی دو خواتین سمیت تین بزرگوں کی موت بھگدڑ سے نہیں بلکہ سانس لینے میں دشواری کے سبب ہوئی ہے۔ انہوں نے کسی کے زخمی ہونے کی خبر کو بھی مسترد کر دیا ہے۔ ڈی ایم کے مطابق موقع پر انتظام بالکل صحیح ہیں۔

وزیر اعلیٰ نتیش کمار نے اس حادثے پر افسوس کا اظہار کیا ہے ۔ انہوں نے بھگدڑ میں جان گنوانے والے افراد کے لواحقین کے حق میں 4-4 لاکھ روپے بطور معاوضہ دینے کا اعلان کیا ہے۔