جہانگیر پوری میں ایک ہی کنبہ کے 26 لوگ کورونا پازیٹیو: کیجریوال

دہلی میں شمال مغربی حصہ کے جہانگیر پوری میں ایک ہی کنبہ کے 26لوگوں کے کوروناپازیٹیو پائے جانے کی وجہ سے دہشت کا ماحول ہے۔

قومی دارالحکومت کے نظام الدین مرکز میں اسپیشل آپریشن کے بعد دہلی میں ایک ہی مقام پر کورونا وائرس (کووڈ۔19) کا یہ دوسرا بڑا معاملہ ہے۔ مرکز کے 1080لوگ اس انفیکشن سے متاثر ہیں۔

وزیراعلی اروند کیجریوال نے سنیچر کو ویڈیو کانفرنسنگ سے میڈیا سے خطاب کرتے ہوئے کہاکہ جہانگیر پوری میں ایک ہی کنبہ کے 26رکن کورونا سے متاثر ہوئے ہیں۔ انہوں نے کہا کہ سنیچر کو 2274نمونوں کی جانچ کی گئی اور 67پازیٹیو پائے گئے ہیں۔ گزشتہ دو تین دنوں کے دوران دہلی میں معاملات میں کمی آئی ہے۔ امید ہے کہ آئندہ دنوں میں نئے معاملے مزید کم ہوں گے۔

مسٹر کیجریوال نے کہاکہ کورونا وائرس کسی سے ہمدردی نہیں کرتا ہے اور لوگوں سے اپیل ہے کہ لاک ڈاون پر سختی سے عمل کریں۔ دہلی میں آج تین مزید مقامات کو ہاٹ اسپاٹ اعلان کیا گیا ہے اور قومی راجدھانی میں اب 71ہاٹ اسپاٹ ہوگئے ہیں۔ ہاٹ اسپاٹ والے علاقوں میں 60مشینوں سے سینی ٹائزیشن کا کام تیزی سے جاری ہے۔

وزیراعلی نے کہا کہ دہلی کے ڈاکٹر، طبی عملہ، پولیس اہلکار، فائر بریگیڈ محکمہ، سول سیکورٹی جیسے محکموں کے بڑی تعداد میں ملازم کورونا کے خلاف اس لڑائی میں اپنی جان خطرے میں ڈال کر کام کررہے ہیں۔ ان کی حفاظت کے لئے احتیاط برتی جارہی ہے لیکن اگر کورونا کی وجہ سے ان کے ساتھ کوئی انہونی ہوجاتی ہے تو ان کے کنبوں کو حکومت ایک کروڑ روپے کی امدادی رقم دے گی۔

دہلی میں کورونا کے 1767معاملے ہیں اور ملک میں یہ انفیکشن کے معاملہ دوسرے نمبر پر ہے۔ یہاں کورونا سے اب تک 42لوگوں کی موت ہوچکی ہے۔ 27مریض انتہائی نگہداشت یونٹ میں اور چھ وینٹی لیٹر پر ہیں۔