26/11: نو سال بعد بھی زخم تازہ

26/11 جدید ہندوستانی تاریخ کا وہ منحوس دن ہے جب پاکستان نے اس ملک پر ایک اور حملہ کیا۔ یہ وہ حملہ تھا کہ جس میں کوئی فوج نہیں تھی بلکہ حملہ آور دہشت گرد تھے۔ سنہ 1971 میں فوجی جنگ میں منھ کی کھانے کے بعد پاکستان کے جنرل ضیاءالحق کی قیادت میں ہندوستان کے ساتھ ایک خاموش مگر مستقل جنگ کا اعلان کر دیا۔ وہ جنگ دہشت گردی کی جنگ ہے۔ اور یہ جنگ سنہ 1980 سے کشمیر میں لگاتار جاری ہے۔ وہی جنگ کبھی ہندوستانی پارلیمنٹ پر دہشت گردانہ حملے کی شکل اختیار کر لیتی ہے تو کبھی ممبئی دہشت گردانہ حملے کا روپ لے لیتی ہے۔ ہندوستان نے واجپئی سے لے کر نریندر مودی تک کئی بار پاکستان کے ساتھ امن و صلح کا ہاتھ بڑھایا لیکن ہر کوشش ناکام رہی۔ 26/11 کی برسی سے چند روز قبل پاکستان نے ممبئی حملے کے ماسٹر مائنڈ حافظ سعید کو رہا کر کے پھر سے یہ اعلان کر دیا کہ پاکستان کی ہندوستان کے خلاف دہشت گردانہ سرگرمی جاری رہے گی۔ ان حالات میں تمام مہذب دنیا کا یہ فرض ہے کہ وہ متحدہ طور پر پاکستان پر ایسا دباﺅ بنائے کہ وہ اپنی دہشت گردانہ پالیسی ختم کرنے پر مجبور ہو جائے۔

26/11 کی برسی کے موقع پر ’قومی آواز‘ ممبئی حملوں میں مارے جانے والے تمام افراد کو خراج عقیدت پیش کرتا ہے اور امید کرتا ہے کہ دہشت گردی کے خلاف جنگ میں ہندوستان کامیاب ہوگا۔