پی ایم مودی کے خلاف قابل اعتراض تبصرہ کرنے والے 2 افسران معطل

وزیر اعظم نریندر مودی کے خلاف قابل اعتراض تبصرہ کرنا دو افسران کے لیے مصیبت بن گیا ہے۔ دونوں افسران کا تعلق کیرالہ ہائی کورٹ سے ہے اور کیرالہ کے چیف جسٹس اے جے دیسائی نے ہائی کورٹ کے دونوں ہی افسران کو فوری اثر سے معطل کرنے کی ہدایت جاری کر دی ہے۔

میڈیا رپورٹس کے مطابق شکایت ملی تھی کہ یوم جمہوریہ تقریب کے دوران ایک اسٹیج شو میں وزیر اعظم نریندر مودی اور ملک کو غلط طریقے سے پیش کیا گیا تھا۔ یہ اسٹیج شو کیرالہ ہائی کورٹ کے جلسہ گاہ میں منعقد ہوا تھا۔ موصولہ خبروں میں بتایا جا رہا ہے کہ کیرالہ ہائی کورٹ میں اسسٹنٹ رجسٹرار ہائی گریڈ ٹی اے سدھیش اور کورٹ کیپر پی ایم سدھیش وہ افسران ہیں جنھوں نے پی ایم مودی اور ملک کو تقریب کے دوران غلط طریقے سے پیش کیا۔

اس سلسلے میں جب خبر پھیلی تو بی جے پی حامی گروپوں نے کیرالہ ہائی کورٹ کے ملازمین کے ذریعہ اسٹیج کیے گئے ’وَن نیشن، وَن ویزن، وَن انڈیا‘ نامی ڈرامہ کے خلاف شکایت کی۔ بعد ازاں چیف جسٹس اے جے دیسائی نے رجسٹرار (وجلنس) سے ایک تفصیلی رپورٹ طلب کی اور رجسٹرار (ایڈمنسٹریشن) سے ان حالات کی تفصیلی جانکاری دینے کو کہا جن میں یہ پورا واقعہ پیش آیا۔ فی الحال فوری اثر سے دونوں افسران کو معطل کر دیا گیا ہے۔