یوپی: کُشی نگر کی شادی میں ماتم، 22 خواتین و بچیاں کنویں میں گریں، 13 کی موت

اتر پردیش کے کشی نگر ضلع سے ایک بہت دردناک خبر موصول ہوئی ہے جس میں نیوز 18 میں شائع خبر کے مطابق 22 خواتین کنویں میں گر گئیں اور ان میں سے 13 کی موت ہو گئی ہے جبکہ 9 کو بچا لیا گیا ہے۔ یہ حادثہ ایک شادی میں پیش آیا ۔

واضح رہے کشی نگر ضلع کے گاؤں نورنگیا میں ایک شادی کی رسم ادا کرنے کے لئے بہت ساری خواتین اور بچیاں ایک کنویں کے پاس جمع ہوئیں اور اچانک کنویں کا ایک سلیب ٹوٹ گیاجس کی وجہ سے 22 خواتین کنویں میں جا گریں ۔ پولیس نے مقامی لوگوں کی مدد سے ان میں سے 9 کو بچا لیا جبکہ 13 کی موت ہو گئی۔اس حادثہ کے بعد شادی کی تقریب ماتم میں بدل گئی۔

واضح رہےحادثہ کی خبر ملتے ہی بڑی تعداد میں انتظامیہ کے لوگ وہاں پہنچ گئے اور راحت کے کام میں جٹ گئے۔اس حادثہ میں ماری گئی خواتین اور بچیوں کی شناخت کر لی گئی ہے۔ راحت کے کام میں کافی دشواری کا سامنا کرنا پڑا ۔ مرنے والے کے اہل خانہ کو چار لاکھ روپے کے معاوضہ کا اعلان کیا گیا ہے۔

واضح رہے نورنگیا گاؤں کے اسکول ٹولہ کے رہنے والے پرمیشور کشواہا کے بیٹے کی آج شادی ہونی ہے جس کی ہلدی کی رسم کل یعنی بدھ کے روز ہونی تھی ۔ اسی رسم میں شرکت کے لئے بڑی تعداد میں خواتین اور بچیاں وہاں آئی تھیں اور گاؤں کے کنویں پر مٹکوڑ رسم کرنے گئی تھیں جبھی یہ حادثہ پیش آیا۔