اتر پردیش: چار دنوں کے اندر پی ایف آئی کے 108 اراکین گرفتار

شہریت ترمیمی قانون اور این آر سی کے خلاف پورے ملک میں احتجاجی مظاہرے جاری ہیں۔ اتر پردیش میں بھی کئی مقامات پر دھرنے و مظاہرے ہو رہے ہیں لیکن گزشتہ 20 دسمبر کو اتر پردیش میں ہوئے پرتشدد مظاہرہ میں کئی لوگوں کی موت ہو گئی تھی۔ تشدد کے الزام میں مظفر نگر سے پی ایف آئی (پاپولر فرنٹ آف انڈیا) کے چار اراکین کو گرفتار کیا گیا ہے۔ پولس کا کہنا ہے کہ ان لوگوں کے پاس سے شہریت ترمیمی قانون کے خلاف کچھ پرچہ بھی برآمد ہوا ہے۔ اتوار کی رات گرفتار پی ایف آئی اراکین کے نام فرمان، نفیس، ادریس اور مرسلین ہیں۔

داخلی امور کے ایڈیشنل چیف سکریٹری اونیش اوستھی نے اس سلسلے میں ایک پریس کانفرنس کی جس میں انھوں نے بتایا کہ گزشتہ چار دنوں میں پی ایف آئی کے 108 اراکین گرفتار ہوئے ہیں جن میں سے 25 لوگوں کو پہلے ہی حراست میں لیا گیا تھا۔ انھوں نے مزید کہا کہ ’’یہ ابھی ایک شروعات ہے۔ ہم ان کی جڑوں تک جائیں گے اور ان کو کہاں سے، کس ذریعہ سے مدد ملتی تھی، اس کی جانچ کریں گے۔ ہم سنٹرل جانچ ایجنسیوں سے رابطہ میں بھی ہیں۔‘‘

پیر کے روز لکھنؤ میں کیے گئے پریس کانفرنس سے خطاب کرتےہوئے اوینیش اوستھی اور ڈی جی پی ہتیش چندر اوستھی نے کہا کہ تشدد بھڑکانے والوں کی گرفتاری کے لئے چلائی جارہی خصوصی مہم کے تحت ان افراد کو گرفتار کیا گیا ہے۔ گرفتار شدہ افراد میں 25 پی ایف آئی کے ذمہ دار ہیں اور باقی اس کے رکن ہیں۔یہ تنظیم 13 اضلاع میں کافی سرگرم ہے۔

گزشتہ چار دنوں میں جن افرد کو گرفتار کیا گیا ہے ان میں سے لکھنؤ سے14،سیتا پور سے3،میرٹھ سے 21،غازی آباد سے 9، مظفر نگر سے 6، شاملی سے7،بجنور سے4،وارانسی سے20،کانپور سے5،گونڈہ سے1،بہرائچ سے 16،ہاپوڑ اور جونپور سے ایک ۔ایک شخص شامل ہیں۔ انہوں نے دعوی کیا کہ اس بات کے وافر ثبوت ہیں کہ اس تنظیم نے سی اے اے/این آر سی کے خلاف احتجاج کے لئے مظاہرین میں پیسے تقسیم کیے اور انہوں نے ہی احتجاج کے دوران تشدد برپا کیا۔