لکھنؤ: 17ویں ’نیشنل بک فیئر‘ کا آغاز 20 ستمبر سے

لکھنؤ: اترپردیش کی راجدھانی لکھنؤ میں دس روزہ سترہویں ’نیشنل بک فیئر‘ کا انعقاد 20 ستمبر سے ہوگا۔ اس بار کتب میلہ کا تھیم مہاتما گاندھی کی 150 وی جینتی ہوگی۔ میلے میں ہمیشہ کی طرح اس بار بھی مقامی مصنفین کے لئے علیحدہ مفت اسٹال لگانے کی سہولت ہوگی جہاں وہ اپنی کتابوں کی نمائش و فروخت کے لئے رکھوا سکیں گے۔

دی فڈریشن آف پبلشرس اینڈ بک سیلس اسوسی ایشن ان انڈیا کے ذریعہ نیشنل بک فیئر میلہ اترپردیش کی راجدھانی لکھنؤ کے موتی محل واٹیکا لان میں 20 سے 29 ستمبر تک چلے گا۔ نیشنل بک فیئر کے ڈویژنل کنوینر منوج سنگھ چندیل نے منگل کو یہاں بتایا کہ مہاتما گاندھی کی 150 ویں جینتی کی تھیم پر مبنی یہ بک فیئر بچوں۔بڑوں کے نام وقف ہوگا۔

انہوں نے بتایا کہ افتتاحی پروگرام میں ریاست کی گورنر آنندی بین پٹیل کو مدعو کیا گیا ہے۔ میلے میں داخلہ بالکل مفت ہوگا جبکہ خریداروں کو ہر قسم کی کتابوں پر 10 فیصد کی چھوٹ ہوگی۔ بک فیئر میں اسٹیٹ اولمپک ایسوسی ایشن کے جنرل سکریٹری آنندیشور پانڈے کو ’پردیش گورو‘ اعزاز سے نوازہ جائےگا۔

بک فیئر میں گجرات کو مہمان ریاست کا درجہ دیا گیا ہے۔ اس کی وجہ سے میلے میں گجرات کی سیاحت و وہاں کے پبلشروں کے اسٹال خصوصی طور سے لگائے جائیں گے۔ میلے میں گجراتی زبان سیکھنے کے خصوصی پروگرام ہوں گے۔ نیز پہلی بار آنکھوں کے معائنے کے کیمپ کا خصوصی انتظام ہوگا جو کہ دسوں دن تک چلے گا۔

انہوں نے بتایا کہ ملک کی معروف و مشہور ’بک فیئر میں شمار، گزشتہ 17 سالوں سے مسلسل منعقد کیا جانے والے اس کتاب میلے میں اترپردیش اکادمی، گڈورڈ، پربھات، راج کمل، کتاب گھر، راج پال، سمائک، لوک بھارتی، سمیک، کیندریہ ہندی ندیشالیہ، گوتم بکس، انڈین سوشل انسٹی ٹیوٹ، پرکاشن سنستھان، ساہتیہ بھنڈار الہ آباد، رام کرشن مشن وغیرہ پبلشرس کے اسٹال ہوں گے۔ ساتھ ہی کونسل فار پرموشن آف سندھی لینگویج و اردو لینگویج، روشنی ببلشنگ، بک ویفے، ورڈ اسمتھ جیسے کئی نئے پبلشر شامل ہوں گے۔

چندیل نے بتایا کہ گنگا جمنی تہذیب کے شہر میں منعقد ہونے والے اس کتاب میلے میں اس بار کتھک، غزل، سنگیت کے خصوصی پروگرام ہوں گے۔ ساتھ ہی پوری ریاست میں کتب میلے کا انعقاد کرنے والے آنجہانی امیش ڈھل کی یاد میں خصوصی کوی سمیلن و مشاعرے کا انعقاد کیا جائے گا۔

چندیل نے بتایا کہ میلے میں ’گاندھی بال یوا منچ‘ پر بچوں کو جہاں اپنی صلاحیتوں کے اظہار کا موقع ملے گا وہیں 22 ستمبر کو کرن فاونڈیشن کے اشتراک سے ڈرائنگ مسابقے کا انعقاد ہوگا جبکہ اورینٹل لینگویج لیب کے اشتراک سے 21 تا 29 ستمبر تک اردو اور 29 ستمبر کو گجراتی زبان کی کلاسیں چلیں گی۔

انہوں نے بتایا کہ کتابوں کی رسم اجراء، مصنفین سے ملاقات، ادب پر تبادلہ خیال جیسے پروگرام نیز کوی سمیلن اور مشاعرہ وغیر جیسے تفریحی و تہذیبی پروگرام میلے میں افراد کے کشش کا باعث ہوں گے۔