عالمی کتاب میلہ اگلے سال یکم تا 9 فروری کو منعقد ہوگا: این بی ٹی

نئی دہلی: اگلے سال نئی دہلی عالمی کتاب میلہ یکم تا 9 فروری2025 کو منعقد ہوگا یہ اطلاع نیشنل بک ٹرسٹ، انڈیا کے چیئرمین پروفیسر ملند سدھاکر مراٹھے نے دی۔ انہوں نے تمام مہمانوں، پبلشرز، شریک آرگنائزنگ تنظیموں اور ذرائع ابلاغ کے نمائندوں کا شکریہ ادا کرتے ہوئے کہا کہ ہمیں یقین کامل ہے کہ آئندہ سال مزید پبلشر اور قارئین اس میلے میں شرکت کریں گے اور میلے سے ہندوستانی اشاعت اور تحریر کی عالمی شناخت مستحکم ہوگی۔

نیشنل بک ٹرسٹ، انڈیا کے ڈائریکٹر یوراج ملک نے کہا کہ نئی دہلی ورلڈ بک فیئر 2024 ہندوستانی پبلی کیشن انڈسٹری کوعالمی سطح پر نئی شناخت دلانے میں بہت کامیاب ہوا۔اس میلہ میں جہاں ایک طرف دنیا کے سرفہرست کتاب میلوں - فرینکفرٹ (جرمنی)، بولوگنا (اٹلی) اس میلے میں ابوظہبی، لندن، ترکی اور شارجہ کے سی ای او نے شرکت کی تو دوسری جانب لوگوں کا جم غفیر بھی نظر آیا۔

انہوں نے مزید کہا کہ اگلے عالمی کتاب میلے کی تیاریاں شروع کر دی گئی ہیں۔ یکم تا 9 فروری 2025 تک منعقد ہونے والے نئی دہلی کے عالمی کتاب میلے سے دلچسپی رکھنے والے پبلشر اپنی شرکت کی درخواستیں این بی ٹی انڈیا کو بذریعہ ای میل ارسال کر سکتے ہیں۔

انہوں نے مزید کہا کہ اگلے سال بی ٹو بی زون کو مزید وسعت دی جائے گی، دنیا کے بہترین کتاب میلے کے منتظمین کا ایک سیمینار منعقد کیا جائے گا اور مہمان ملک کے ساتھ ساتھ مرکز کے زیر انتظام ریاست یا مرکز کے زیر انتظام علاقوں سے ادب کی خصوصی نمائش ہوگی۔ فیسٹیول مزید جامع ہوں گے، قارئین اپنے پسندیدہ مصنفین سے ملنے کے لیے سفارشات ای میل کر سکتے ہیں۔

خیال رہے کہ حالیہ پرگتی میدان میں 10 سے 18 فروری کے درمیان منعقد ہونے والا نئی دہلی عالمی کتاب میلہ کئی لحاظ سے خاص تھا۔ جہاں کتاب سے محبت کرنے والوں کی تعداد میں اضافہ دیکھا گیا، وہیں ہندوستان کی اشاعتی صنعت نے بھی نئی بلندیوں کو چھو لیا اس نو روزہ نئی دہلی عالمی کتاب میلے میں 700 سے زیادہ ادبی اور تخلیقی پروگرام منعقد ہوئے۔

اس کی ایک خاص بات یہ تھی کہ صدر جمہوریہ دروپدی مرمو نے نئی دہلی عالمی کتاب میلے کے موقع پر راشٹرپتی بھون میں منعقدہ آرٹ، لٹریچر اور کمپوزیشن پروگرام میں پردھان منتری یوا یوجنا 1.0 کے 55 نوجوان مصنفین اور پردھان منتری یوا یوجنا 2.0 کے 37 نوجوان مصنفین سے ملاقات کی تھی۔ راشٹرپتی بھون میں ہی پی ایم یوتھ مینٹرشپ اسکیم 1.0 کے تحت منتخب کتابوں کی ایک نمائش کا بھی اہتمام کیا گیا تھا۔