آئی پی ایل 2020: گواسکر نے وراٹ کو ایسا کیا کہا جو انوشکا بھڑک گئیں؟

نئی دہلی: رائل چیلنجرس بنگلور کے کپتان وراٹ کوہلی کی اہلیہ اور مشہور اداکارہ انوشکا شرما نے سابق ہندوستانی کرکٹر اور موجودہ کمنٹیٹر سنیل گواسکر کے وراٹ اور انوشکا پر نازیبا تبصروں پر سخت تنقید کی ہے وراٹ نے کنگز الیون پنجاب کے خلاف مایوس کن کارکردگی کا مظاہرہ کیا اور حریف کپتان لوکیش راہل کا کیچ دو بار ڈراپ کیا جبکہ وہ خود بھی صرف ایک رن پر آؤٹ ہوئے۔ بنگلور کی ٹیم میچ 97 رنز سے ہار گئی تھی ۔

گواسکر ساتھی کمنٹیٹر آکاش چوپڑا کے ساتھ کمنٹری کر رہے تھے اور انہوں نے وراٹ کی ناقص کارکردگی کے لئے ان پر اور ان کی اہلیہ انوشکا پر ایک مضحکہ خیز تبصرہ کیا جس کے بعد وراٹ کے مداحوں نے انہیں سوشل میڈیا پر نشانہ بنا لیا۔ اس سے پہلے بھی انوشکا کو وراٹ کی ناقص کارکردگی کے لئے نشانہ بنایا گیا تھا ۔

سوشل میڈیا پر 34 سیکنڈ کے ایک کلپ میں گواسکر کمنٹری کے دوران ہندی میں کہتے ہوئے پائے گئے کہ "وراٹ جانتے تھے کہ جتنی زیادہ وہ پریکٹس کریں گے اتنا ہی زیادہ انہیں فائدہ ہوگا لیکن جب ملک کورونا کی وجہ سے لاک ڈاؤن میں تھا اس وقت انھوں نے صرف انوشکا کی گیند بازی پر ہی مشق کی، اس سے انہیں کوئی فائدہ نہیں ملے گا ۔

گواسکر کا اشارہ ممکنہ طور پر ایک ایسے کلپ کی طرف سوشل میڈیا پر وائرل ہوا تھا جس میں وراٹ کو انوشکا کے گھر کی چھت پر گیند پھینکنے کا سامنا کرتے ہوئے دکھایا گیا تھا ۔ ایک پڑوسی نے اس کی ایک ویڈیو بنائی تھی اور یہ ویڈیو سوشل میڈیا پر وائرل ہوگئی۔ تاہم چوپڑا نے اس اسٹار جوڑی کی خلوت میں مداخلت کرنے پر افسوس کا اظہار کیا۔

انوشکا نے گواسکر پر جوابی حملہ کرتے ہوئے کہا کہ گواسکر جی آپ کی رائے غلط ہے لیکن میں جاننا چاہتی ہوں کہ آپ کسی کے شوہر کے کھیل کی وجہ سے اس کی بیوی کو کیوں نشانہ بنا رہے ہیں۔ مجھے یقین ہے کہ آپ نے ہر کرکٹر کی ذاتی زندگی پر اتنے سالوں میں تبصرہ نہ کرکے عزت کی ہے پھر آپ کو نہیں لگتا کہ آپ کو ہمارے ساتھ یکساں سلوک کرنا چاہئے تھا۔

انہوں نے کہا کہ مجھے یقین ہے کہ آپ میرے شوہر کی کارکردگی کے بارے میں دوسرے الفاظ استعمال کرسکتے تھے لیکن کیا یہ مناسب تھا کہ صرف میرے نام پر تبصرہ کریں؟ اب 2020 چل رہا ہے لیکن میرے لئے چیزیں اب بھی نہیں بدلی ہیں۔ آخر کب تک میرا نام کرکٹ میں گھسیٹا جائے گا۔ محترم گواسکر جی آپ کا نام اس کھیل کے لیجنڈ کرکٹرز میں سے ایک ہے۔ میں صرف یہ بتانا چاہتی ہوں کہ آپ کے بیان سے مجھے کیسا محسوس ہوا ہے۔