بٹلر کی لگاتار دوسری سنچری، راجستھان کی دہلی پر سنسنی خیز جیت

جوس بٹلر (116) کی مسلسل دوسری سنچری کے ساتھ راجستھان رائلز نے دہلی کیپٹلس کوآئی پی ایل مقابلے میں 15 رنز سے شکست دے دی۔راجستھان نے 20 اوور میں دو وکٹ پر 222 کا مضبوط اسکوربنایا اور دہلی کے چیلنج کو آٹھ وکٹ پر 207 تک محدود کردیا۔

راجستھان کی ٹیم سات میچوں میں اپنی پانچویں جیت اور 10 پوائنٹس کے ساتھ ٹیبل میں ٹاپ پر پہنچ گئی ہے۔ دوسری طرف دہلی کو سات میچوں میں چوتھی شکست کا سامنا کرنا پڑا۔

ہدف کا تعاقب کرتے ہوئے دہلی کو اچھی شروعات کی ضرورت تھی۔ ڈیوڈ وارنر اور پرتھوی شا نے دہلی کو 4.3 اوور میں 43 رنز کا عمدہ آغاز فراہم کیا۔ پرسدھ کرشنا نے وارنر کو وکٹ کیپر سنجو سیمسن کے ہاتھوں کیچ کرایا۔ وارنر نے 14 گیندوں پر 28 رنز میں پانچ چوکے اور ایک چھکا لگایا۔ سرفراز خان ایک رن بنانے کے بعد آؤٹ ہوئے۔ سرفراز کو آف اسپنر روی چندرن اشون نے شکار کیا۔

پرتھوی شا 27 گیندوں میں پانچ چوکوں اور ایک چھکا کی مدد سے 37 رنز بنانے کے بعد اشون کا دوسرا شکار بنے۔ کپتان رشبھ پنت 24 گیندوں میں 44 رنز بنا کر پرسدھ کرشنا کی گیند پر دیو دت پڈیکل کے ہاتھوں کیچ آؤٹ ہوئے۔ اکشر پٹیل ایک رن بنانے کے بعد یزویندر چہل کی گیند پربولڈ ہوگئے۔ شاردل ٹھاکر 10 رنز بناکر دوسرارن لینے کی کوشش میں رن آوٹ ہوگئے۔ ان وکٹوں کے گرنے کے درمیان للت یادو دوسرے سرے پررن بناتے رہے۔

روومین پاول نے آتے ہی دو چھکے لگائے۔ دہلی کو آخری دو اووروں میں 36 رنز درکار تھے۔ کرشنا نے للت یادو کو 19ویں اوور میں پویلین کا راستہ دکھایا۔ للت نے 24 گیندوں میں تین چوکوں اور دو چھکوں کی مدد سے 37 رنز بنائے۔ کرشنا نے 19 واں اوور میڈن پھینکا اور للت کا وکٹ بھی لیا۔ پاول نے آخری اوور کی پہلی گیند پر سیدھا چھکا لگایا۔ پاول نے اوبیڈ میک کوئے کی دوسری گیند پربھی چھکا لگایا۔

تیسری گیند بھی چھکے کے لئے شائقین کے درمیان پہنچ چکی تھی۔ تیسری گیند نو بال ہے یا نہیں اس کو لے کر جھگڑا ہوا۔ کپتان پنت تودونوں بلے بازوں کو باہر بلانے کا اشارہ کرنے لگے۔ لیکن اس سے پاول کا سلسلہ ٹوٹ گیا۔ پاول دوبارہ چھکا نہ لگا سکے اور آخری گیند پر آؤٹ ہو گئے۔ پاول نے 15 گیندوں میں پانچ چھکوں کی مدد سے 36 رنز بنائے۔

اس سے قبل بٹلر نے 65 گیندوں میں نو چوکوں اور نو چھکوں کی مدد سے 116 رنز بنائے۔ بٹلر اس کے ساتھ ہی بنگلور کے وراٹ کوہلی کے بعد ایک سیزن میں 3 سنچریاں بنانے والے دوسرے کھلاڑی بھی بن گئے۔ ویراٹ کا 2016 میں 4 سنچریاں بنانے کا ریکارڈ خطرے میں دکھائی دے رہا ہے۔ بٹلر نے اوپنر دیودت پڈیکل کے ساتھ ابتدائی شراکت میں صرف 92 گیندوں پر 155 رنز جوڑے۔ پڈیکل نے 35 گیندوں پر 54 رنز میں سات چوکے اور دو چھکے لگائے۔ کپتان سنجو سیمسن نے 19 گیندوں پر 46 رنز میں پانچ چوکے اور تین چھکے لگائے۔

راجستھان نے پہلے پانچ اووروں میں 29 رنز بنائے تھے لیکن اس کے بعد بٹلر نے دہلی کے گیند بازوں کی حالت خراب کردی۔ دہلی کی جانب سے خلیل احمد نے 47 رن پر ایک وکٹ اور مستفیض الرحمن نے 43 رن پر ایک وکٹ لیا۔