آئی پی ایل 2020: ممبئی کے خلاف راجستھان کو واپسی کرنی ہوگی

ابوظہبی: جیت کی راہ پر دوڑ رہی گزشتہ چیمپئن ممبئی انڈینس کو روکنے اور ٹورنامنٹ میں واپسی کرنے کے لئے راجستھان رائلس کو اتوار کو ہونے والے آئی پی ایل مقابلے میں اپنا سب کچھ لگانا ہوگا۔ ممبئی کی ٹیم اپنے گزشتہ مقابلے میں چنئی سپر کنگس کو دس وکٹ سے روندنے کے بعد اس میچ میں اتر رہی ہے اور اسے پلے آف میں جگہ بنانے کے لئے صرف ایک جیت کی ضرورت ہے۔ دوسری طرف راجستھان کو ممبئی کی طاقت سے ہوشیار رہنا ہوگا۔ راجستھان نے اپنا گزشتہ میچ سن رائزرس حیدرآباد کے ہاتھوں آٹھ وکٹ سے گنوایا تھا۔

راجستھان اس وقت پوائنٹ ٹیبل میں آٹھ پوائنٹس کے ساتھ ساتویں نمبر پر ہے۔ راجستھان نے گیارہ میچوں میں سے چارمیں جیت حاصل کی ہے اور سات میں اسے شکست ملی ہے۔ راجستھان کو یہاں سے ہر میچ جیتنے کی ضرورت ہے تاکہ 14پوائنٹ پر کچھ ٹیموں کے ساتھ ٹائی رہنے پر اس کے لئے کوئی موقع بن سکے۔

راجستھان کی حیدرآباد کے خلاف کافی مایوس کن کارکردگی رہی تھی اور ٹیم 154رن ہی بنا سکی تھی۔ راجستھان کی گیند بازی کافی خراب رہی تھی جس کا فائدہ اٹھاکر حیدرآباد نے دو وکٹ گنوا کر ہدف حال کرلیا تھا۔

راجستھان رائلس کے کپتان اسٹیون اسمتھ نے کہا کہ میں کسی کو قصوروار نہیں ٹھہرا سکتا۔ کئی اچھے کھلاڑی اور اچھی ٹیمیں ہیں۔ ہم مسلسل جیت حاصل نہیں کرسکے۔ ہمیں جیتتے رہنے کی ضرورت ہے اور پتہ نہیں ہمارے لئے چیزیں کیسے کام کرے گی۔ ابھی ہمارا یہی کام ہے کہ ہمیں جیتتے رہنا ہوگا۔

دوسری طرف ممبئی کی ٹیم طوفانی فارم میں ہے اور اس نے اپنے باقاعدہ کپتان روہت شرما کے بغیر ہی چنئی کو 114رن پر روکنے کے بعد دس وکٹ سے میچ جیت لیا تھا۔ روہت کی جگہ کیرون پولارڈ نے کپتانی سنبھالی اور اپنی کپتانی میں آئی پی ایل میں پندرہواں میچ جیتا۔ اس جیت کے بعد ممبئی کی ٹیم روہت کو ایک آدھ میچ کے لئے آرام دے سکتی ہے تاکہ وہ پلے آف کے وقت مکمل طورپر فٹ رہیں۔