آئی پی ایل 2020: پنجاب سے شکست پر دہلی کو فکرمند نہیں ہونا چاہیے... کگیسو رباڈا

آئی پی ایل سیزن 13 میں اب تک سب سے زیادہ وکٹ لینے والے دہلی کیپٹلز کے تیز گیندباز کگیسو رباڈا کا کہنا ہے کہ گزشتہ میچ میں کنگز الیون پنجاب سے شکست پر ٹیم کو فکر مند ہونے کی ضرورت نہیں ہے۔ ہفتہ کے روز دہلی کیپٹلز کا مقابلہ کولکاتا نائٹ رائیڈرس سے ہے، اور اس سے ایک دن قبل رباڈا نے کہا کہ "مجھے نہیں لگتا ہے کہ پنجاب کے خلاف ملی شکست ٹیم کے لیے آنکھیں کھولنے والی بات ہے۔ یہ صرف ایک شکست ہے، اس لیے اس میں کوئی پریشانی والی بات نہیں ہے اور ہم واپسی کرنے کی کوشش کر رہے ہیں۔" انھوں نے مزید کہا کہ "ہمیں یہ دیکھنا ہوگا کہ ہم سے کہاں غلطی ہوئی تھی، جسے ہمیں درست کرنا ہوگا۔ ہم نے کھیل اور اس شعبہ کے بارے میں بھی بات کی ہے جہاں ہم بہتری کر سکتے ہیں۔"

رباڈا نے اپنی بات آگے بڑھاتے ہوئے کہا کہ "شکست کسی کو بھی مل سکتی ہے اور اس لیے یہ صرف واپسی کرنے اور اگلے میچ کے لیے تیار ہونے کے بارے میں ہے۔ ہم نے جو غلط کیا ہے اور درست کیا ہے، اس کی پہچان کرنے کے لیے ہمیں بس کچھ معمولی جوڑ توڑ کرنے کی ضرورت ہے۔"

واضح رہے کہ آئی پی ایل سیزن 13 میں دہلی کیپٹلز کی ٹیم اب تک 10 میچوں میں 7 فتح کے ساتھ 14 پوائنٹ لے کر ٹیبل میں پہلے مقام پر ہے۔ حالانکہ آج ممبئی انڈینز اور چنئی سپر کنگز کے درمیان میچ کھیلا جا رہا ہے جس میں ممبئی بہ آسانی فتحیاب ہوتی ہوئی محسوس ہو رہی ہے۔ اگر ممبئی یہ میچ جیت جاتی ہے تو پہلے مقام پر ممبئی کا قبضہ ہو جائے گا اور دہلی دوسرے مقام پر چلی جائے گی۔