آئی پی ایل 2020: فکسنگ کا بحران، بی سی سی آئی نے کی تصدیق

دبئی: متحدہ عرب امارات (یو اے ای ) کے بایوسیکیور ماحول میں کھیلے جارہے آئی پی ایل کے 13 ویں ایڈیشن میں فکسنگ کے بادل منڈلا رہے ہیں جس کی تصدیق بی سی سی آئی نے بھی کی ہے۔ ایک باہری ایجنٹ نے آئی پی ایل میں کھیل رہے کھلاڑی سے فکسنگ کے سلسلے میں رابطہ کیا ہے۔ اس معاملے کی تصدیق بی سی سی آئی کی اینٹی کرپشن یونٹ (اے سی یو) نے کی ہے۔ اے سی یو کے سربراہ ارجیت سنگھ نے کہا کہ آئی پی ایل میں ایک کھلاڑی سے کسی نامعلوم شخص نے فکسنگ کے سلسلے میں رابطہ کرنے کی کوشش کی تھی۔ اس ایجنٹ کا پتہ لگانے کی کوشش کی جارہی ہے۔

آئی پی ایل حالانکہ بایو سیکیور ماحول میں کھیلا جارہا ہے جہاں کوئی بھی کھلاڑی سے براہ راست رابطہ نہیں کرسکتا ہے لیکن آن لائن پلیٹ فارم کے سبب کھلاڑیوں سے رابطہ کیا جاسکتا ہے۔ بی سی سی آئی نے آئی پی ایل میں فکسنگ اور سٹے بازی پر لگام لگانے کے لئے برطانیہ کی کمپنی ’اسپورٹ رڈار‘ کے ساتھ معاہدہ کیا ہے جو جانچ کے عمل کے ذریعہ بدعنوانی کی سرگرمیوں پر نظر رکھے گی۔