اُردو زبان نہیں، ایک مکمل تہذیب ہے: کامنا پرساد

آبا و اجداد کی زبان اُردو تھی اس لیے گھر کے ماحول میں اُردو نے اپنی جگہ بنائی ہوئی تھی۔ اس ماحول میں رہ کر مجھے بھی اُردو سے محبت ہوئی۔ اس زبان میں جو کشش اور دلکشی ہے وہ کسی کو بھی اپنی طرف کھینچنے کی قوت رکھتی ہے، اور پھر مجھے تو بچپن سے ہی یہ ماحول ملا تھا اس لیے اُردو سے لگاؤ ہونا فطری عمل ہے۔

مشاعرہ جشن بہار کا آغاز 1999 میں ہوا تھا اور اس کا مقصد یہ تھا کہ ہم اپنی گنگا-جمنی تہذیب کو فروغ دیں۔ اس وقت ایک مشہور مشاعرہ کسی وجہ سے کچھ مدت کے لیے بند ہو گیا تھا اور میں نے اس پر فکرمندی کا اظہار کرتے ہوئے خشونت سنگھ سے کہا کہ ایسا مشاعرہ شروع ہونا چاہیے جو ہندوستانی تہذیب کی پاسدار ہو۔ خشونت سنگھ جو اس مشاعرے کے پہلے پیٹرن بھی تھے، انھوں نے کہا کہ ’’تو کر لے۔‘‘ حالانکہ میرے لیے مشاعرہ شروع کرنا اس وقت بہت مشکل تھا لیکن میں نے ہمت کی اور سردار جعفری، قرۃالعین حیدر، کلدیپ نیر جیسی شخصیتوں کے تعاون سے مرحلہ آسان ہو گیا۔ آج بہت خوشی ہو رہی ہے یہ سوچ کر کہ 13 اپریل 2018 کو ہم 20واں مشاعرہ جشن بہار منعقد کرنے جا رہے ہیں۔

یقیناً، جس مقصد سے ہم نے مشاعرہ جشن بہار کا آغاز کیا تھا، اس میں ہم کامیاب ہیں۔ مجھے بہت خوشی ہے کہ ہم نے مشاعرے کے معیار کو برقرار رکھا ہے اور شروع سے ہی ہماری یہ کوشش رہی ہے کہ اُردو اور اس کی تہذیب کا پاس رکھا جائے۔ میں نے 1999 کے پہلے مشاعرے میں تقریر کے دوران کہا تھا کہ اُردو زبان نہیں ایک مکمل تہذیب ہے، اور آج بھی میں یہی کہوں گی۔ اس تہذیب کو زندہ رکھنا ہمارا ’پرم دھرم‘ ہے۔ ہم ہمیشہ یکجہتی اور امن کی بات کرتے ہیں اور اُردو، جو کہ کئی زبانوں سے مل کر بنی ہے اور اس کا ایک نام ’ریختہ‘ بھی ہے، ہندوستانی تہذیب کی علمبردار ہے۔