انٹرویو— مودی حکومت ملک کو برباد کرنے پر آمادہ: گہلوت

صرف میں نے ہی نہیں بلکہ گجرات انتخابات کے دوران سب نے اس بات کو نوٹس کیا ہے کہ جس طرح بھیڑ کا رجحان اندرا جی کی ریلیوں میں دیکھنے کو ملتا تھا وہی رجحان اس بار انتخابات میں راہل کی ریلیوں میں بھی دیکھنے کو ملا۔ مجھے ان سب کے کام کرنے کا طریقے میں فرق کم اور یکسانیت زیادہ نظر آتی ہے۔ اندرا جی کے دور میں جب میں نے سیاست شروع کی تھی تب میں نوجوان تھا۔ میری طرح میرے دوسرے ہمعصر نوجوانوں کو، جس میں غلام نبی آزاد، مکل واسنک، دگ وجے سنگھ جیسے لوگ شامل ہیں، اندرا جی نے سیاست میں آگے بڑھایا۔ اسی طرح راجیو گاندھی نے بھی اپنے دور میں کانگریس پارٹی میں نوجوان سوچ کو آگے بڑھنے کا موقع دیا۔ راہل گاندھی بھی ٹھیک ایسا ہی کر رہے ہیں۔ علاوہ ازیں راہل گاندھی بھی اندرا کی طرح غریبوں کے حق کی بات کرتے ہیں، ایک مثبت سیاست کرنا ان کے خون میں شامل ہے۔

مودی حکومت ملک کو برباد کرنےپر آمادہ ہے۔ کسان خود کشی کر رہے ہیں، تاجر خوفزدہ ہیں۔ میڈیا بھی خوف یا کسی مجبوری کے سبب ان کا ساتھ دے رہی ہے لیکن جمہوریت میں ایساہمیشہ نہیں چل سکتا۔ دوسروں کو چھوڑیے، خود ان کی پارٹی کے لوگ خوفزدہ ہیں۔ سچ بولنے کی ہمت کسی میں نہیں ہے۔ مودی حکومت کے وزراء بھی کچھ بولنے سے پہلےسو بار سوچتے ہیں۔ سب کے منھ پر تالا لگا ہوا ہے۔ کسی کی ہمت نہیں کہ مودی اور امت شاہ کی لائن سے ہٹ کر کچھ بول دیں۔ لیکن میں کہنا چاہتا ہوں کہ تین سالوں میں ملک کے اندر خوف کا راج چلتا رہا لیکن یہ اب زیادہ دنوں تک نہیں چلنے والا۔ کوئی حیرانی نہیں کہ اگلے انتخابات میں آپ کو ملک کی سیاست میں بڑی تبدیلیاں دیکھنے کو ملیں ۔ بی جے پی-آر ایس ایس اور فاشسٹ طاقتوں کا خاتمہ بھی ممکن ہے۔

راہل جی کی رہنمائی میں ہر ریاست کے مدنظر الگ الگ پالیسی تیار کی جائے گی۔ پارٹی کو مضبوط کرنا، کارکنان کو متحد کرنا اور جمہوری سوچ رکھنے والی پارٹیوں کو ایک پلیٹ فارم پر لانا کانگریس کی پہلی اور بڑی ترجیحات ہوں گی۔ ایشوز پر مبنی انتخابی تشہیر پر توجہ دی جائے گی جیسا کہ ہم نے گجرات میں بھی کیا۔ راہل گاندھی کی سوچ کو مرکز نگاہ رکھ کر مثبت پالیسی کے ساتھ کانگریس انتخابی تشہیر کے لیے میدان میں اترے گی۔

اپوزیشن کمزور نہیں بلکہ بکھرہ ہوا ہے۔ اگر 2014 کے انتخابات کی ہی بات کریں تو بی جے پی کو 31 فیصد ووٹ ملے تھے جب کہ اپوزیشن کو 69 فیصد ووٹ ملے۔ اس کا مطلب یہ ہے کہ ملک میں ان لوگوں کی تعداد زیادہ ہے جنھوں نے مودی-بی جے پی کی قیادت کو خارج کیا۔ اگر اپوزیشن متحد ہو کر 2019 میں انتخابات لڑے گا تو بی جے پی کے پاس کچھ بھی نہیں بچے گا۔ یہ بات آر ایس ایس اور بی جے پی کے لوگ بھی اچھی طرح جانتے ہیں اس لیے ذات اور مذہب کی بنیاد پر لوگوں کو بانٹنے والی سیاست کر رہے ہیں۔

دیکھیے، پہلا انتخاب میں نے 1977 میں لڑا تھا اسمبلی کا۔ وہ ٹکٹ میں نے مانگا تھا۔ اس کے بعد میں ہمیشہ ممبر پارلیمنٹ رہا۔ تین مرتبہ مرکز میں وزیر رہا اور دس سال ریاست کا وزیر اعلیٰ رہا۔ مجھے سب کچھ بغیر مانگے ملا۔ تین مرتبہ ریاستی کانگریس کا صدر رہا اور دو مرتبہ کانگریس کا جنرل سکریٹری رہا، یہ سب کچھ بغیر کسی گروہ بندی اور بغیر کسی سفارش کے ملا۔ جب بغیر کچھ کہے پارٹی کی اعلیٰ قیادت نے مجھ پر اعتماد ظاہر کیا ہے تو پھر کچھ کہنے کی ضرورت کیا ہے؟ مجھے جو ذمہ داری دی جائے گی میں اس کو بخوبی نبھانے کی کوشش کروں گا۔