مودی کو اقتدار سے باہر کرنے کے لیے پرعزم ہوں: شرد یادو

یہ صرف سماجی و ثقافتی محاذ کا کام نہیں ہے۔ یہ اتحاد کی راہ کھولنے والی مہم ہے۔ آنے والے وقت میں شروع ہونے والے جدوجہد کی یہ ایک طرح کی تیاری ہے۔ اس کی شکل کیا ہوگی، اس میں کون لوگ شامل ہوں گے اور اس کی قیادت کون کرے گا اس سے متعلق فی الحال کچھ بھی نہیں کہا جا سکتا۔فی الحال میرا مقصد ہے بی جے پی کو اقتدار سے باہر کرنا۔ اگر یہ اقتدار میں بنے رہیں گے تو ملک کے سامنے بہت مشکلیں آنے والی ہیں۔ ہمارا آئین، ملک کی آزادی حاصل کرنے کے لیے دی گئی قربانیاں سب کچھ ختم ہو جائے گا۔ یہ دن بھر ہندو-مسلمان کے درمیان تفریق پیدا کرتے رہتے ہیں۔ ہمارا ملک تین ٹکڑوں میں پہلے ہی تقسیم ہو چکا ہے، کیا دنیا میں ایسا کوئی ملک آپ نے دیکھا ہے جہاں اس طرح کی تقسیم ہوئی ہو! کبھی یہ اسلام کے نام پر تقسیم کرتے ہیں تو کبھی ذات برادری کے نام پر تقسیم کرتے ہیں۔ خود ذات برادری کی سیاست کرتے ہیں لیکن الزام لگاتے ہیں دوسرے لوگوں پر۔ ہمیں سمجھنا ہوگا کہ ذات برادری ہمارے ملک کی سماجی سچائیاں ہیں۔ راہل گاندھی بالکل ٹھیک کہتے ہیں کہ مودی اور بی جے پی کی ساری باتیں جھوٹ کی بنیاد پر ٹکی ہوئی ہیں۔

گجرات میں 1985 کے بعد کانگریس نے پہلی مرتبہ اتنی شاندار کارکردگی کا مظاہرہ کیا ہے۔ یہ بات سچ ہے کہ گجرات کے لوگ تبدیلی کے لیے تیار تھے، وہاں کے لوگ بی جے پی کے خلاف سڑکوں پر جدوجہد کر رہے تھے لیکن راہل نے اس جدوجہد کو ایک سیاسی چہرہ دیا۔ کانگریس کی کارکردگی کا سہرا یقینا کانگریس کی قیادت کے سر بندھنا چاہیے۔ گجرات میں کانگریس کی بہتر کارکردگی کے لیے راہل گاندھی کی تعریف کی جانی چاہیے کیونکہ انتخابی مہم کی قیادت تو وہی کر رہے تھے۔

کہتے ہیں کہ تاریخ خود کو دوہراتا ہے۔ سونیا کے دور سے راہل کے وقت کا موازنہ کریں تو کہا جا سکتا ہے کہ کانگریس کی تاریخ بھی خود کو دوہرا رہی ہے۔ جب سونیا جی نے 1998 میں کانگریس کی ذمہ داری سنبھالی تھی تب بھی حالات کم و بیش ایسے ہی تھے۔ آج راہل کے سامنے وہی چیلنجز ہیں جو سونیا کے سامنے اُس وقت تھیں لیکن ان چیلنجز کا چہرہ بڑا ہے۔ اُس وقت بھی مرکز میں این ڈی اے کی حکومت تھی اور سونیا کا مقابلہ بے حد مضبوط پارٹی اور تشہیری نظام سے تھا لیکن 2004 میں سونیا جی نے واپسی کی اور دس سال تک کانگریس برسراقتدار رہی۔ میرا ماننا ہے کہ آج راہل کے چیلنجز بڑے ہیں۔ آج بی جے پی کا تشہیری نظام زیادہ مضبوط، تنظیم مستحکم اور پیسہ و طاقت بھی پہلے سے کہیں زیادہ ہے۔ ایسے میں راہل گاندھی کو سخت مقابلے کے لیے تیار رہنا ہوگا۔ دراصل یہ چیلنجز صرف راہل گاندھی کے سامنے نہیں ہیں بلکہ پورے ملک کے لیے ہے۔ چونکہ کانگریس ملک کی دوسری سب سے بڑی پارٹی ہے اور اس کی قیادت راہل گاندھی کر رہے ہیں تو ظاہر ہے ان کی ذمہ داری زیادہ ہے۔

بی جے پی ایک پارٹی کی شکل میں آر ایس ایس کا مکھوٹا ہے۔ بی جے پی، امت شاہ، مودی، یہ سب محض کٹھ پتلیاں ہیں۔ اسی لیے یہ کہنا غلط نہیں ہوگا کہ گجرات کے انتخابی نتائج نہ صرف بی جے پی، مودی و امت شاہ بلکہ آر ایس ایس اور پوری رائٹ وِنگ سوچ کی شکست ہے۔ 2014 میں جس رائٹ وِنگ نظریہ کا عروج شروع ہوا تھا اس کے زوال کی شروعات گجرات انتخابات کے ساتھ ہو چکی ہے۔

لالو جی کو ذیلی عدالت نے قصوروار ٹھہرایا ہے۔ میں مانتا ہوں کہ لالو جی اس کیس کے ملزم ہیں۔ جو لوگ آج حکمرانی کر رہے ہیں ان لوگوں نے ان کے خلاف کیس چلایا۔ میں سمجھتا ہوں کہ وہ ہائی کورٹ سے بری ہوں گے۔ اس سے قبل ان کے اوپر آمدنی سے زیادہ ملکیت رکھنے کا معاملہ چلایا گیا لیکن اس معاملے میں وہ سپریم کورٹ سے بری ہو گئے۔ چارہ گھوٹالہ کے معاملے میں بھی وہ بری ہوں گے۔جہاں تک اس پورے معاملے کے سیاسی اثر کا تعلق ہے، لالو جی کے جیل جانے سے ان کی اور ہماری طاقت میں مزید اضافہ ہوگا۔ جب اسمبلی انتخابات کے دوران اتحاد ہوا تھا تب بھی ان کے اوپر کیس تھا، وہ جیل گئے تھے لیکن اسمبلی انتخابات میں اتحاد کو فتح و کامرانی حاصل ہوئی تھی۔ پرانی جنتا دل فیملی ایک ہوئی اور کانگریس کا تعاون حاصل ہوا تو بی جے پی کو ہم نے بہار میں دھول چٹا دیا۔ ایک بار پھر یہی ہوگا۔ جیل جانے سے لوگوں میں لالو جی کی عزت مزید بڑھے گی۔

میری راجیہ سبھا رکنیت ختم کرنا ایک سیاسی فیصلہ تھا۔ ہم لوگ جنتا دل یو کے آئین اور اصول کو ماننے والے ہیں۔ ہم لوگوں نے بہار کے مینڈیٹ کی عزت کرتے ہوئے نتیش کمار کے بی جے پی میں شامل ہونے کی مخالفت کی لیکن سازش کے تحت میری رکنیت ختم کی گئی۔ جو لوگ تقریر دے رہے تھے کہ آر ایس ایس سے پاک ہندوستان بنائیں گے اور کہہ رہے تھے کہ زہر کھا لیں گے لیکن بی جے پی کے ساتھ سمجھوتہ نہیں کریں گے وہی بی جے پی کی گود میں جا کر بیٹھ گئے۔ کپل سبل میرا مقدمہ لڑ رہے ہیں۔ فی الحال تو عدالت نے اسٹے آرڈر دے دیا ہے لیکن آخری فیصلہ 31 مارچ کو آئے گا۔ ویسے میں سوچتا ہوں کہ یہ اچھا ہی ہوا۔ اب میرے پاس ملک بھر کا دورہ کرنے اور لوگوں سے ملاقات کے لیے کافی وقت ہے۔ پہلے میرا بہت سارا وقت پارلیمنٹ میں گزرتا تھا لیکن اب میں خود کو مستقبل کے سیاسی کام کے لیے زیادہ اہل محسوس کرتا ہوں۔