’بھارت بند‘ نے بھسما سُر کی یاد تازہ کر دی: اُدت راج  

انھیں بابا صاحب سے ڈر لگتا ہے۔ دراصل اعلیٰ ذات کو سیدھی ٹکر تو یہیں سے ملی تھی اور آج بھی یہیں سے مل رہی ہے۔ یہی سبب ہے کہ اتنے حملے ہو رہے ہیں اور اعلیٰ ذات کے لوگوں میں نفرت کی آگ جل رہی ہے۔

میں تو یہ سمجھتا ہوں کہ یہ بی جے پی کی غلط فہمی ہے۔ کسی کے پاس زیادہ ممبران پارلیمنٹ ہو ں تو اس کا یہ مطلب نہیں کہ وہ پارٹی دلتوں سے زیادہ قریب ہے۔ دلت ممبران پارلیمنٹ ہونے سے دلت کا اس پارٹی سے جڑنا قطعاً ضروری نہیں ہے۔

ناراضگی کے کئی اسباب ہیں... سپریم کورٹ کا فیصلہ، یونیورسٹیوں میں ٹیچر کی تقرری میں ریزرویشن کی بات، نجکاری میں لگاتار اضافہ، ملازمت میں کمی۔ کئی ایسی وجوہات ہیں جس کے پیش نظر 2 اپریل کو احتجاجی مظاہرہ ہوا اور اس میں نوجوانوں کی زیادہ تعداد کو دیکھ کر ان کے مسائل کا اندازہ بخوبی کیا جا سکتا ہے۔

دو چیزیں پہلی بار ہوئی ہیں۔ جب دلت مخالفت پر آمادہ ہوئے تو اعلیٰ ذات ان کے خلاف آئے... ایسا کیوں ہوا۔ جب باقی لوگ احتجاجی مظاہرہ کرتے ہیں تو دلت تو ان کی مخالفت نہیں کرتے، پھر انھوں نے دلتوں کے خلاف کیوں آواز اٹھائی۔ گوالیار میں بھی دلتوں کے احتجاج کے خلاف بڑے پیمانے پر اعلیٰ ذات کے لوگ سڑکوں پر نکل آئے۔ گوالیار میں تو یہ بھی ثابت ہو گیا کہ گولی مارنے والے دوسری ذات کے لوگ تھے۔ میں کسی بھی طرح کے تشدد کی حمایت نہیں کر رہا، لیکن دلتوں پر قہر برپا ہو رہا ہے۔ میرٹھ سے لے کر ملک بھر میں دلتوں کو پھنسایا جا رہا ہے۔

انھیں لگتا ہے کہ جو ہماری پاؤں کی جوتی تھے وہ اب ہمارے برابر آ رہے ہیں۔ یہ مفاد پرستی اور جلن و حسد کی وجہ سے ہے۔ دلتوں کی ترقی اور ان کی بہتر طرز زندگی اعلیٰ ذات کے لوگوں کو پسند نہیں آ رہی ہے۔