انٹرویو—مولانا سلمان ندوی نے پرسنل لاء بورڈ پر شری شری روی شنکر کو ترجیح دی

شری شری روی شنکر صاحب سے جب میری بات ہوئی تو میں نے ان کے سامنے تین باتیں رکھیں۔ میں نے کہا کہ سب سے پہلی شرط یہ ہے کہ جن لوگوں نے بابری مسجد منہدم کی ہے ان لوگوں کو سزا ملنی چاہیے۔ میری دوسری شرط تھی کہ مسجد کی موجودہ 70 بیگہ زمین کو بڑھا کر 140 بیگہ زمین آپ لوگ دیجیے جہاں یونیورسٹی اور مسجد بن سکے۔ اور تیسری شرط یہ کہ معاہدہ پختہ ہونا چاہیے اور یہ معاہدہ سپریم کورٹ کی طرف سے بھی رجسٹرڈ ہو جس میں یہ اعلان ہو کہ کسی مسجد، کسی درگاہ، کسی مسجد مدرسے اور کسی قبرستان کے ساتھ آئندہ چھیڑ چھاڑ نہیں ہوگی۔ یہ تین باتیں ہماری ان کے ساتھ ہوئی ہیں۔

ہماری ان شرطوں سے وہ متفق تھے۔ ان کا کہنا تھا کہ مسلمان اگر ایسا کرتے ہیں تو اس سے بہتر اور کیا ہو سکتا ہے۔ میرا تو بس اتنا ماننا ہے کہ ہماری مسجد محفوظ رہے۔ پہلے والی جگہ پر مسجد بنے گی تو جھگڑا بنا رہے گا۔ بظاہر تو وہاں پر مسجد بننے کے آثار نظر ہی نہیں آ رہے ہیں، لیکن اگر فرض کیجیے کہ بن بھی جائے تو وہاں کون نماز پڑھنے جائے گا۔ وہاں تو لوگ پہلے بھی نہیں جاتے تھے۔ اس بات کو سمجھنا ضروری ہے کہ مسجد کا ڈھانچہ اصل نہیں ہوتا، اصل تو نماز ہوتی ہے۔ مسجد میں نماز ہو اور اچھی آبادی کے ساتھ ہو، اس سے بہتر اور کیا ہو سکتا ہے۔ اس لیے میرا مشورہ تھا کہ وہاں سے فاصلے پر، یعنی فیض آباد سے لکھنؤ تک کہیں پر بھی اچھی اراضی دی جائے اور وہاں مسجد و یونیورسٹی کی تعمیر کا کام شروع ہو۔

ان لوگوں میں کمال فاروقی اور قاسم رسول الیاس صاحب وغیرہ شامل تھے۔ قاسم رسول الیاس نے بہت ہنگامہ برپا کیا۔ وہ میری بات کے دوران میں ہی ٹوک دیا کرتے تھے جس سے میرا کچھ بھی بولنا مشکل ہو رہا تھا۔ میں نے ان سے کہا کہ مجھے پوری بات کہنے دیجیے پھر آپ اپنی بات رکھیے گا، لیکن ہنگامہ ہوتا رہا جس سے اندازہ ہوا کہ ان کا مقصد معاملے کو سلجھانا نہیں بلکہ بگاڑنا تھا۔

مولانا رابع صاحب اور مولانا ارشد مدنی صاحب تو خاموش ہی بیٹھے تھے۔ مولانا ولی رحمانی صاحب جلسہ چلا رہے تھے اور کبھی کبھی لوگوں کو روکتے بھی تھے اورمجھ سے بھی یہ کہا کہ تقریرنہ کیجیے۔ لیکن میں تو صرف اپنی بات ان سب کے سامنے رکھنا چاہ رہا تھا بعد میں انھیں جو فیصلہ کرنا ہوتا وہ کر لیتے۔

جو میرے نظریے سے متفق ہوں گے وہ خاموش ہی رہے۔ مولانا محمود مدنی صاحب نے یہ ضرور کہا تھا کہ جو ماحول بن رہا ہے وہ ٹھیک نہیں ہے، مولانا کے خلاف جو ہم لوگ کر رہے ہیں وہ نامناسب ہے۔ انھوں نے دفاع میں بھی کچھ بات کی تھی۔

اب اگر کوئی میری بات سننے کے لیے رضامند ہی نہیں ہے تو ظاہر ہے کہ وہاں میرا جانا بے معنی ہے۔ میرا کسی سے کوئی ذاتی جھگڑا تو ہے نہیں کہ جانا ضروری ہو۔

وہ تو ان کا فیصلہ ہے، جو چاہیں وہ کریں۔ میں نے کہہ دیا ہے کہ جو چاہیں آپ فیصلہ کیجیے۔ جہاں تک میرے استعفیٰ دینے کا سوال ہے تو فی الحال اس تعلق سے میں نے ان کو کوئی خط نہیں بھیجا ہے۔ جو کچھ ہو رہا ہے اس سے ظاہر ہوتا ہے کہ بورڈ بالکل ’ہائی جیک‘ ہو گیا ہے، اس لیے میں نے خود کو اس سے علیحدہ کر لیا ہے۔ لیکن باقاعدہ طور پر استعفیٰ نامہ ابھی میں نے نہیں بھیجا ہے۔