انٹرویو — غالب اُردو کی طرح ہندی اور انگریزی داں طبقہ میں بھی مقبول: عبدالنصیب خان

حسن عبداللہ صاحب اور روپا پبلی کیشن نے جب مجھے ترجمہ کی ذمہ داری سونپی تو میں انہماک کے ساتھ اس میں لگ گیا۔ کتاب میں کل 803 اشعار شامل ہیں اور جہاں تک میرا اندازہ ہے کہ اس کے ترجمہ میں تقریباً پانچ سے چھ مہینے لگے ہوں گے۔

ترجمہ بذات خود ایک مشکل فن ہے اور جب ترجمہ غزل کا ہو، اور وہ بھی غالب کی غزل کا تو مشکلات میں مزید اضافہ لازمی ہے۔ غالب کے یہاں موجود ترادف ترجمہ میں مشکل پیدا کرتے ہیں جو کہ تین طرح کے ہیں، پہلا تہذیبی ترادف، دوسرا لسانی ترادف اور تیسرا اسلوبی ترادف۔ میں شاعری کے انگریزی تراجم پہلے بھی کیے ہیں اور افسانوں کے تراجم بھی کیے ہیں لیکن غالب کے اشعار کا ترجمہ کافی محنت طلب رہا۔ میں آپ کے سامنے ایک مثال پیش کرتا ہوں، آپ غالب کا یہ شعر دیکھیں:

ہر ایک بات پہ کہتے ہو تم کے تو کیا ہے

تم ہی کہو کہ یہ اندازِ گفتگو کیا ہے

اس شعر کے پہلے مصرع میں ’تم‘ بھی ہے اور ’تو‘ بھی ہے۔ انگریزی ترجمہ میں اس طرح کے ترادف مشکل پیدا کرتے ہیں اور اس طرح کے ترادف غالب کے اشعار میں کئی جگہ دیکھنے کو ملتے ہیں۔ ترجمہ کے دوران میں نے یہ کوشش کی ہے کہ اشعار کے اصل معنی سے ہم دور نہ جائیں۔ دراصل مترجم کی سب سے بڑی دیانت داری بھی یہی ہے کہ اشعار کے اصل معنی کی ترسیل بہت اچھے ڈھنگ سے ہو۔

یہاں پر میں ایک بات کہنا چاہوں گا کہ اردو شاعری کا ترجمہ اور غالب کے اشعار کا ترجمہ بہت ہوا ہے۔ انگریزی زبان میں تو غالب کے تقریباً آٹھ دس کلیکشن موجود ہیں لیکن بغیر اُردو شعر کو سامنے رکھے ان کا انگریزی ترجمہ پڑھیں گے تو پتہ ہی نہیں چلے گا کہ یہ کس شعر کا ترجمہ ہے۔ ترجمہ نگاروں نے کہیں لفظی ترجمہ بھی کر دیا ہے اور کہیں کچھ زیادہ ہی آزادی اختیار کر لی ہے۔ دیانت دار مترجم کی ذمہ داری ہوتی ہے کہ تشبیہ کو تشبیہ ہی رہنے دیں اور اشعار میں موجود اشاروں کو سمجھیں۔ ایسا وہی کر سکتا ہے جو شاعر کے حالات اور اس وقت کے ٹریڈیشن کو سمجھتا ہو۔ ویسےعام طور پر جو مترجمین ہیں انھوں نے ماڈرن اردو شاعری میں نظموں کے ترجمے کو ترجیح دی ہے۔ مثلاً حالی اور اقبال وغیرہ کی ایسی نظموں کو ترجمہ کے لیے منتخب کیا گیا جو آسان تھیں۔

غالب کو تو سبھی پسند کرتے ہیں اور اچھی بات یہ ہے کہ غیر مسلم بھی اب انھیں پڑھنے لگے ہیں۔ لیکن جدید دور کے نوجوانوں کو میرا ایک مشورہ یہ ضرور ہے کہ آپ کے پاس جو لٹریچر موجود ہے، جو شاعری موجود ہے آپ اس کو بغور پڑھیں۔ حالی، اقبال فیض یا پھر اخترالایمان، ن م راشد وغیرہ سبھی کو پڑھیں کیونکہ اس سے ذہن وسیع ہوتا ہے اور سوچنے کا نظریہ بدل جاتا ہے۔ ساتھ ہی شاعری میں موجود غنائیت، تغزل اور موسیقیت پر گرفت مضبوط ہوتی ہے۔

انتخاب تو میرا نہیں ہے، یہ پورا انتخاب حسن عبداللہ صاحب کا ہے۔ انھوں نے بنیادی طور پر ادوار کے مطابق غالب کے اشعار کا ترجمہ اس کتاب میں پیش کیا ہے۔ دراصل کالی داس رضا گپتا کا غالب کی غزلوں پر مشتمل ایک کلیکشن ہے جس سے اشعار کے انتخاب میں کافی استفادہ کیا گیا ہے۔ کبھی کبھی مصنّفین ایسے اشعار کا انتخاب کرتے ہیں جس سے وہ متاثر ہیں یا جو ان کے نظریات کی پاسداری کرتا ہے، مجھے لگتا ہے کہ ’ایولیوشن آف غالب‘ میں شامل اشعار اس کے بھی محرک ہوں گے۔

دیکھیے، ترجمہ نگاری ایک ایسا فن ہے جس نے نئے قاری کو جنم دیا ہے۔ آج اگر ادبی کینوس پر اُردو چمک رہی ہے تو وہ ترجمہ کی وجہ سے۔ اگر میں یہاں یہ کہوں کہ غالب کے اشعار کے انگریزی تراجم نے غالب کو عالمی پہچان عطا کی تو یہ غلط نہیں ہوگا۔ غالب آج اُردو داں طبقہ کی طرح ہی ہندی داں طبقہ میں بھی مقبول ہیں، اس کی وجہ بھی یہی ہے کہ ان کی غزلیں اور نظمیں ہندی زبان میں شائع ہو چکی ہیں۔ ہاں، مترجمین کو اس بات کاخیال ضرور رکھنا چاہیے کہ ترجمہ چاہے جس فن کا ہو، اس کی روح باقی رہنی چاہیے۔