کیا گینگسٹر گولڈی براڑ کو امریکہ میں قتل کر دیا گیا؟ امریکی پولیس کی وضاحت

نئی دہلی: پنجابی گلوکار سدھو موسی والا قتل کے کلیدی ملزم گولڈی براڑ کے قتل کا دعویٰ کیا جا رہا ہے۔ رپورٹ میں دعویٰ کیا جا رہا ہے کہ گولڈی براڑ کو امریکہ میں گولی مار کر ہلاک کر دیا گیا ہے۔ تاہم اب اس معاملے پر امریکی پولیس نے بیان جاری کیا ہے۔

امریکی پولیس نے گولڈی براڑ کے قتل کے دعوؤں سے متعلق رپورٹ کو سراسر جھوٹ قرار دیا ہے۔ پولیس کا کہنا ہے، ’’ہم اس بات کی تصدیق کر سکتے ہیں کہ امریکہ کی ریاست کیلیفورنیا میں قتل ہونے والا شخص گولڈی براڑ نہیں ہے۔ ہم نہیں جانتے کہ براڑ کے قتل کی افواہ کیسے پھیلی۔ بین الاقوامی نیوز ویب سائٹس نے ہماری طرف سے بغیر کسی تصدیق کے گولڈی براڑ کے قتل کی خبریں شائع کرنا شروع کر دیں۔‘‘

خیال رہے کہ گولڈی براڑ نے امریکہ میں پناہ لی ہوئی ہے اور اس پر وہاں سے پنجاب، دہلی، ہریانہ اور کینیڈا میں مسلسل مجرمانہ سرگرمیاں انجام دینے کا الزام ہے۔ گولڈی براڑ اور لارنس بشنوئی گینگ کی وجہ سے اب وہ نہ صرف ہندوستان بلکہ کینیڈا، فلپائن اور روس میں بھی گینگ وار ہو رہے ہیں۔

گینگسٹر گولڈی براڑ کا اصل نام ستیندر سنگھ عرف ستیندر سنگھ جیت سنگھ ہے۔ ایجنسیوں کا دعویٰ ہے کہ گولڈی پاکستان کی مدد سے ہندوستان میں دہشت گردی کی کارروائیاں کرتا ہے۔ وہ کئی قتل اور اسلحہ کی اسمگلنگ میں ملوث رہا ہے۔ یہاں تک کہ وہ قتل کے لیے نشانے باز بھی مہیا کرواتا ہے۔ بدنامہ زمانہ مجرم گولڈی براڑ کو اس سال مرکزی حکومت نے دہشت گرد قرار دیا ہے۔

گولڈی، کہا جاتا ہے، کو پنجابی گلوکار سدھو موسی والا قتل کیس کا ماسٹر مائنڈ سمجھا جاتا ہے۔ ذرائع کے مطابق اس کے اشارے پر ہی بشنوئی گینگ کے کارندوں نے گلوکار کا قتل کیا۔ وہ سال 2021 میں ہندوستان سے فرار ہو کر کینیڈا چلا گیا تھا۔ اس کے بعد وہ کبھی کینیڈا اور کبھی امریکہ میں رہتے ہوئے مجرمانہ اور دہشت گردانہ کارروائیاں کرتا رہا ہے۔ وہاں سے ایک ماڈیول کے ذریعے وہ پنجاب سمیت کئی ریاستوں میں جرائم کو انجام دیتا ہے۔

وزارت داخلہ کی جانب سے جاری کردہ نوٹیفکیشن میں انہیں دہشت گرد تنظیم ببر خالصہ انٹرنیشنل سے وابستہ بتایا گیا ہے۔ آپ کو بتاتے چلیں کہ تحقیقاتی ایجنسیوں کو گولڈی براڑ کی آخری لوکیشن امریکہ میں ہی ملی تھی۔ معلومات کے مطابق گولڈی امریکہ میں فرضی نام سے رہ رہا ہے۔