حیرت انگیز: موبائل فون 7 ماہ تک مصری نوجوان کے پیٹ میں رہا!

القاہرہ: مصر کے شہر بنہا میں اپنی نوعیت کے انوکھے واقعے میں ڈاکٹروں کی ٹیم ایک شہری کے پیٹ سے موبائل فون نکال لینے میں کامیاب ہو گئی۔ شہری نے یہ موبائل فون 7 ماہ قبل نگل لیا تھا۔

تفصیلات کے مطابق چند روز قبل 28 سالہ مصری شہری حسن رشاد بنہا یونیورسٹی ہسپتال پہنچا اور ڈاکٹر سے اپنے معدے میں درد کا ذکر کیا۔ بعد ازاں مطلوبہ ٹیسٹ اور ایکسرے سے یہ بات سامنے آئی کہ حسن کے پیٹ میں موبائل فون موجود ہے۔ حسن کے مطابق اس نے تقریبا 7 ماہ قبل دوستوں کے ساتھ مذاق کے دوران یہ موبائل فون نگل لیا تھا۔

تاہم اس نے اپنے گھر والوں کو اس بات سے آگاہ نہیں کیا کیوں کہ حسن کا خیال تھا کہ کسی وقت قے کے ذریعے فون اس کے پیٹ سے باہر آ جائے گا۔

ڈاکٹروں کی ٹیم نے فوری طور پر حسن کے پیٹ کا آپریشن کر کے موبائل فون اس کے معدے سے نکال لیا۔ یہ آپریشن دو گھنٹے جاری رہا۔

ڈاکٹروں کا کہنا ہے کہ "مریض خوش قسمت رہا کہ موبائل فون کی بیٹری پیٹ میں تحلیل ہونا شروع نہیں ہوئی اور مریض کے پیٹ میں زہر نہیں پھیلا۔ بیٹری نوجوان کے پیٹ میں پھٹ سکتی تھی یا پھر تحلیل بھی ہو سکتی تھی جس سے اس کی موت واقع ہو جاتی"۔ طبی ذرائع کے مطابق مریض اس وقت زیر علاج ہے۔