ٹرمپ 72 گھنٹے بعد اسپتال سے پہنچے وائٹ ہاؤس، سب کے سامنے ماسک اتار دیا!

امریکہ جہاں کورونا کا قہر سب سے زیادہ ہے وہاں پر وبا کے خلاف احتیاط نہ برتنا کوئی بہادری نہیں ہے بلکہ ایک غلط پیغام دینے جیسا ہے۔ امریکی صدر ڈونالڈ ٹرمپ جو کورونا وائرس سے متاثر پائے گئے تھے ان کو 72 گھنٹے اسپتال میں علاج کرانا پڑا، لیکن اسپتال سے وہائٹ ہاؤس منتقل ہوتے ہی انہوں نے وہائٹ ہاؤس کی بالکونی میں تصویر کے لئے ماسک اتار دیا۔ واضح رہے تمام طبی ماہرین اس بات پر متفق ہیں کہ ماسک اس وبائی وائرس کو پھیلنے سے روکنے کا سب سے موثر طریقہ ہے۔

صدر ٹرمپ واشنگٹن کے فوجی اسپتال میں 72 گھنٹے تک زیرِ علاج رہنے کے بعد کل وائٹ ہاؤس پہنچے تو وہاں موجود افراد نے اُن کا استقبال کیا۔ والٹر ریڈ نیشنل ملٹری میڈیکل سینٹر سے چھٹی ملنے کے بعد صدر ٹرمپ نے سب کا شکریہ ادا کیا۔ وہائٹ ہاؤس پہنچنے پر صدر ٹرمپ نے میڈیا کے کیمروں کو دیکھ کر اپنے دونوں انگوٹھے فضا میں بلند کیے اور ماسک اُتار دیا۔

اس موقع پر صدر ٹرمپ نے ذرائع ابلاغ کے سوالوں کے جواب میں کہا کہ وہ بہت اچھا محسوس کر رہے ہیں ۔ واضح رہے انہوں نے ایک ٹوئٹ کے ذریعہ امریکی عوام سے کہا کہ انہیں کورونا وائرس سے خوفزدہ ہونے کی ضرورت نہیں ہے اور وہ اس مرض کو اپنے اوپر حاوی نہ ہونے دیں۔

انتخابات کے دباؤ کی وجہ سے صدر ٹرمپ پوری کوشش کر رہے ہیں کہ وہ بہادری کا مظاہرہ کریں، لیکن ابھی ان کا کورونا کا علاج جا ری ہے اس لئے انہیں ماسک ہر وقت لگائے رکھنا چاہیے۔ واضح رہے صدر ٹرمپ کی انتخابی مہم کے منتظمین کا کہنا ہے کہ ری پبلکن امیدوار 15 اکتوبر کو ہونے والے دوسرے صدارتی مباحثے میں شرکت کرنے کے لئے منصوبہ بندی کر رہے ہیں۔

صدر ٹرمپ کے معالج ڈاکٹر شان کونلی نے پیر کی شام میڈیا کو بریفنگ دیتے ہوئے بتایا کہ ڈاکٹروں نے مشاورت کے بعد فیصلہ کیا ہے کہ صدر ٹرمپ کی حالت بہتر ہے اور وہ گھر واپس جا سکتے ہیں۔ انہوں نے کہا کہ وائٹ ہاؤس میں طبی سہولیات موجود ہیں اور ڈاکٹرز ہر وقت اُن کی نگرانی کے لیے دستیاب ہوں گے۔

واضح رہے کہ صدر ٹرمپ اور ان کی اہلیہ خاتون اول میلانیا ٹرمپ گزشتہ جمعہ کو کورونا وائرس کا شکار ہو گئے تھے۔ اسی روز صدر ٹرمپ کو بخار کی شدت میں اضافے کے سبب اسپتال میں منتقل کر دیا گیا تھا۔