دوسری عالمی جنگ کی یاد دلا رہی روس-یوکرین جنگ، ہر سیکنڈ ایک بچہ بن رہا پناہ گزیں

یوکرین پر روسی فوجیوں کا حملہ لگاتار جاری ہے۔ جب سے ان دونوں ممالک کے درمیان جنگ شروع ہوئی ہے تب سے 30 لاکھ سے زائد لوگ یوکرین چھوڑ کر پڑوسی و دور دراز ممالک میں پناہ لے چکے ہیں۔ انٹرنیشنل آرگنائزیشن آف مائیگریشن (آئی او ایم) نے اس سلسلے میں تفصیلی جانکاری دی ہے جس میں بتایا گیا ہے کہ روزانہ 1.50 لاکھ لوگ یوکرین چھوڑ کر دوسرے ممالک میں پناہ لے رہے ہیں۔

اقوام متحدہ کی مہاجرین کے لیے بنی ایجنسی یو این ایچ سی آر کے ترجمان میتھیو سالٹ مارش نے بتایا کہ یوکرین سے ہجرت کرنے والوں میں بیشتر خواتین اور بچے شامل ہیں۔ اقوام متحدہ کے مطابق 24 فروری سے اب تک تقریباً 15 لاکھ بچوں نے بھی یوکرین چھوڑ دیا ہے۔ اقوام متحدہ نے بتایا کہ گزشتہ 20 دن میں روزانہ 70 ہزار یوکرینی بچے پناہ گزیں بن رہے ہیں، یعنی ہر منٹ 55 اور ہر سیکنڈ ایک بچہ مہاجر بن رہا ہے۔

روسی اور یوکرین کے درمیان ہو رہی جنگ میں جتنی تیزی سے یوکرینی باشندوں کی ہجرت ہو رہی ہے، اتنی تیزی سے یوروپ میں اس سے قبل دوسری عالمی جنگ کے دوران ہجرت ہوئی تھی۔ گویا کہ روس-یوکرین جنگ دوسری عالمی جنگ کی یاد دلا رہی ہے۔ یو این ایچ سی آر کے ہائی کمشنر فلپو گرانڈی نے کچھ دن پہلے ٹوئٹ کر کہا تھا کہ دوسری عالمی جنگ کے بعد یہ پہلی بار ہے جب اتنی تیزی سے ہجرت ہو رہی ہے۔

یوکرین میں مہاجر بحران کس قدر فکر انگیز ہے اس کا اندازہ اسی بات سے لگایا جا سکتا ہے کہ 20 دن میں 30 لاکھ سے زیادہ لوگوں نے یوکرین چھوڑ دیا، روزانہ 150000 لاکھ یوکرین چھوڑ رہے ہیں، ہر گھنٹے 6250 شہری یوکرین کو الوداع کہہ رہے ہیں، ہر منٹ 104 یوکرینی شہری مہاجر بن رہے ہیں، اور ہر سیکنڈ دو افراد پڑوسی ملک میں پناہ لے رہے ہیں۔