سری لنکا کی نئی وزیر اعظم کا ہندوستان سے ہے خاص رشتہ، دونوں ممالک کے تعلقات پر سبھی کی نظریں

سری لنکا میں انورا کمارا دسانائیکے کی قیادت میں حکومت کی تشکیل ہو چکی ہے۔ وہ سری لنکا کے پہلے مارکسسٹ رہنما ہیں جو صدر کا عہدہ سنبھال رہے ہیں۔ اس کے علاوہ اس نئی حکومت میں وزیر اعظم کا عہدہ ڈاکٹر ہرینی امرسوریہ کو ملا ہے۔ خاص بات یہ ہے ان کا ہندوستان سے ایک خاص رشتہ رہا ہے۔ دراصل انہوں نے اپنی کالج کی پڑھائی دہلی سے کی ہے۔

سری لنکا کی وزیراعظم ہرینی امر سوریہ نے کالج کے اپنے ابتدائی سال دہلی یونیورسٹی میں گزارے ہیں۔ وہ مشہور ہندو کالج کی 1991 سے 1994 بیچ کی طالبہ ہیں۔ دہلی سے سماجیات میں گریجویشن کرنے کے بعد ڈاکٹر ہرینی نے آسٹریلیا سے اینتھروپلاجی میں ماسٹر کی ڈگری حاصل کی۔ اس کے بعد انہوں نے ایڈنبرگ یونیورسٹی سے سوشل اینتھروپلاجی میں پی ایچ ڈی بھی کیا۔ ڈاکٹر ہرینی نوجوانوں، سیاست، نااتفاقی، ایکٹیوزم، اطفال تحفظ اور ترقیات سے جڑے معاملوں پر ریسرچ کرنے کے ساتھ ساتھ کتابیں بھی لکھ چکی ہیں۔

ہرینی امر سوریہ کی پیدائش کولمبو میں ہوئی اور وہیں ان کا بچپن گزرا۔ وہ نیشنل پیپلز پاور (پی این پی) پارٹی کی رہنما ہیں۔ تعلیم سے لے کر ساست داں بننے کے اس سفر نے آج انہیں سری لنکا کی تیسری خاتون وزیر اعظم کے عہدہ تک پہنچا دیا۔ ان سے پہلے سری لنکا میں دو اور خاتون وزیراعظم بن چکی ہیں جن کے نام سری ماؤ بھنڈارنائیکے اور چندریکا کمارتنگا ہیں۔ سری ماؤ بھنڈارنائیکے تو تین مرتبہ وزیر اعظم کے عہدے پر رہیں، ساتھ ہی ان کے پاس کسی ملک کی پہلی خاتون وزیراعظم ہونے کا ریکارڈ بھی ہے۔

سری لنکا میں نئی حکومت کی تشکیل کے بعد سے ہی ہندوستان کے ساتھ رشتوں کو لے کر کئی باتیں ہو رہی ہیں اور اس کے پیچھے کی وجہ صدر انورا دسانائیکے کی پارٹی کا متنازعہ بیان بھی ہے۔ چین بھی سری لنکا کو اپنے ساتھ لانے کی ساری کوششیں کر رہ رہا ہے۔ ہندوستان اور چین دونوں ممالک کے لیے سری لنکا کو خاص مانا جاتا ہے۔