کورونا وبا سے عالم اسلام کی عید کی خوشیاں ماند پڑ گئیں

سعودی عرب سمیت عالم اسلام کے متعدد ممالک میں کل یعنی اتوار کے روز عید الفطر منائی جائے گی۔ جن ممالک اور علاقوں میں عید اتوار کے روز منائی جانے کا اعلان ہو چکا ہے وہ سعودی عرب، متحدہ عرب امارات، یروشلم، مصر، اردن، کویت، لیبیا، لبنان، ترکی، انڈونیشیا، ملائشیا، فلپائن، سنگاپور ہیں۔ ہندوستان کی ریاست کیرالہ اور کرناٹک کے ساحلی علاقوں میں بھی عید الفطر اتوار کو منائی جائے گی۔ جبکہ ہندوستان اور پاکستان میں چاند نظر آنے کی صورت میں اتوار ورنہ پیر کے روز عید ہوگی۔

اس بار عید الفطر ایک ایسے وقت میں آئی ہے جب مسلم ممالک سمیت پوری دنیا کورونا وبا کی لپیٹ میں ہے اور کورونا وبا کے نتیجے میں عالم اسلام کی عید کی خوشیاں ماند پڑ گئی ہیں۔ کورونا کی وجہ سے نہ تو بازاروں میں عید کی خریداری کے لئے وہ پہلے جیسی چہل پہل ہے اور نہ دکانداروں کے پاس وافرق مقدار میں اشیاء موجود ہیں۔ لوگ معاشی خوف کی وجہ سے عید کی شا پنگ سے گریز کررہے ہیں۔

تین روز تک جاری رہنے والی عید الفطر کے موقعے پر مسلمان شہری دور دراز سے سفر کر کے اپنے خاندان سے ملنے جاتے ہیں۔ گھروں میں انواع و اقسام کے کھانے بنائے جاتے ہیں اور گھروں میں دن بھر مہمانوں کی آمد ورفت جاری رہتی ہے۔ مگر اس بار کروڑوں مسلمان گھروں میں بند ہونے کی وجہ سے عید کی خوشیوں سے فائدہ نہیں اٹھا سکیں گے۔

عرب اور کئی مسلمان ممالک میں ٓکل اتوار کے روزعید منائی جائے گی۔ مگر عالم اسلام اس وقت کورونا کی وجہ سے انتہائی مشکل حالات سے دوچار ہے۔ مسلمان حکومتیں کورونا وبا کی روک تھام کے لیے کڑے اور مشکل فیصلے کرنے پر مجبور ہیں۔

بعض عرب اور مسلمان ممالک نے عید الفطرکے موقعے پر لاک ڈاؤن میں نرمی کی ہے۔ تاہم مسلمان ممالک نے عوام سے اپیل کی ہے کہ کورونا وبا کے خطرے کے پیش نظر وہ گھروں سے باہر نہ نکلیں۔ مسلمان حکومتوں نے عوام الناس پر زور دیا ہے کہ وہ عید کی نمازیں اپنے گھروں میں ادا کریں اور میل جول میں سختی سے گریز کریں۔ سفر اور نقل وحرکت کو محدود رکھیں، بازاروں، ساحلوں، پارکوں، تجارتی مراکز اور تفریحی مقامت پر جانے سے گریز کریں۔

خیال رہے کہ پوری دنیا میں کورونا وبا سے اب تک تین لاکھ 29 ہزار افراد لقمہ اجل بن چکے ہیں جب کہ کورونا کی وبا سے اب تک 50 لاکھ 49 ہزار 390 افراد بیمار ہوئے ہیں۔ مجموعی طورپر کورونا اب تک 196 ممالک میں پھیلا ہوا ہے۔

(العربیہ ڈاٹ نیٹ)