تائیوان زلزلہ: حکومتی اقدام کی ستائش

تائیوان میں 3 اپریل کو 7.4 شدت کے زلزلے کے بعد ایسے خدشات ظاہر کیے جا رہے تھے کہ اس زلزلے سے بڑے پیمانے پر جان و مال کے نقصان کی اطلاعات موصول ہوں گی۔ ساتھ ہی سونامی کے الرٹ نے صورتحال کو مزید سنگین بنا دیا تھا۔ تائیوان کی نیشنل فائر ایجنسی (این ایف اے) کے مطابق زلزلے سے مرنے والوں کی تعداد 13 ہو گئی ہے جب کہ ایک ہزار سے زائد افراد زخمی ہیں۔ لگ بھگ 400 لوگ اب بھی پھنسے ہوئے ہیں اور ریسکیو کے منتظر ہیں۔ حکام کا کہنا ہے کہ پھنسے ہوئے افراد محفوظ ہیں لیکن جزیرے کے بری طرح متاثر ہوئے مشرقی ساحل کے قریب دیہی سڑکوں پر لینڈ سلائیڈنگ اور دیگر رکاوٹوں کی وجہ سے ان کا رابطہ منقطع ہے۔

تائیوان کے 25 سالوں میں سب سے زیادہ طاقتور اس زلزلے نے پورے جزیرے کو ہلا کر رکھ دیا تھا اور اسے ہانگ کانگ اور شنگھائی تک محسوس کیا گیا تھا۔ تائیوان کے ماہرین زلزلہ کا کہنا ہے کہ اس کی توانائی ہیروشیما پر گرائے گئے 32 ایٹم بموں کے برابر تھی۔ تائیوان میں 1999 کے 7.7 شدت کے زلزلے سے 2400 افراد ہلاک اور 10,000 زخمی ہوئے تھے۔ پچھلے ہفتے ہلاکتوں کی کم تعداد کا سہرا حکومت کے سر ہے جس نے 25 سال پہلے سیکھے گئے سبق کی بنیاد پر تیاری کی ہوئی تھی۔

وو نامی شخص تائیوان کی ہوالین کاؤنٹی میں ایک چھوٹا ہوٹل چلاتے ہیں۔ انہوں نے کہا کہ حکومت نے 1999 کے زلزلے کے بعد بلڈنگ کوڈز کا ایک جامع جائزہ لیا اور ہدایات جاری کیں کہ تمام نئی عمارتوں کوایسی نئی ٹیکنالوجیز کا استعمال کرنا چاہیے جو انہیں زلزلوں کا سامنا کرنے میں زیادہ لچکدار بناتی ہیں۔ ماہرین کا کہنا ہے کہ حکومتی اقدامات نے زلزلے سے متاثرہ جزیرے کو زلزلوں میں بڑے پیمانے پر جانی نقصان سے بچنے میں مدد فراہم کی ہے۔ 3 اپریل کے زلزلے کے بعد دکانیں اور ریستوراں دوبارہ کھل گئے ہیں۔ ٹرینیں شیڈول کے مطابق چل رہی ہیں۔ زلزلے کی سب سے زیادہ طاقتور علامت 10 منزلہ عمارت ہے، جو گراؤنڈ فلور کے گرنے کے بعد 45 ڈگری کے زاویے پر غیر یقینی طور پر جھک گئی۔ کھدائی کرنے والوں نے یورینس نامی اس بلڈنگ کی بنیاد پر ملبے کا ڈھیر لگا دیا ہے تاکہ اسے سہارا دیا جا سکے۔ تباہ شدہ عمارتوں کی مرمت شروع کر دی گئی ہے۔ لیکن تائیوان کے مشرقی ساحل پرواقع ایک لاکھ کی آبادی والا شہر مجموعی طور پر محفوظ رہا ہے۔

نارتھ ایسٹرن یونیورسٹی میں پولیٹیکل سائنس اور پبلک پالیسی کے پروفیسر ڈینیئل ایلڈرچ نے سی این این کو بتایا کہ تائیوان میں اس بار کم ہلاکتیں ایک خوبصورت معجزہ ہے۔ انہوں نے ہیٹی، ہندوستان اور چین میں پچھلے زلزلوں کے دوران دسیوں ہزار اموات کا حوالہ دیتے ہوئے کہا کہ 7.5 (شدت) کے زلزلوں میں کہیں زیادہ ہلاکتیں ہوئی ہیں۔ ماہرین کا کہنا ہے کہ تائیوان نے 25 سال قبل آنے والے تباہ کن زلزلے سے سبق سیکھا اور آئندہ آفات سے نمٹنے کے لیے تیاری کی۔ ایلڈرچ کے مطابق 1999 میں جب زلزلہ آیا تو تائیوان پوری طرح تیار نہیں تھا۔ اس ضمن میں انہوں نے تعمیراتی صنعت میں بدعنوانی، عمارت کے ضوابط کی کمی اور اس وقت بچاؤ کی کوششوں میں ناکافی ہم آہنگی کا حوالہ دیا۔ 1999 میں آنے والے زلزلے سے تائیوان بھر میں 100,000 سے زیادہ عمارتیں مکمل یا جزوی طور پر منہدم ہو گئیں تھیں، جن میں تقریباً 300 اسکول بھی شامل تھے۔ زلزلے کے مرکز سے تقریباً 100 میل دور دارالحکومت تائی پے میں بھی عمارتیں زمین بوس ہو گئیں تھیں۔

تب سے، حکومت نے آفات سے نمٹنے کے قوانین کو مضبوط کیا ہے، بچاؤ اور راحت کے لیے بہتر ہم آہنگی پیدا کی ہے، اور زلزلے کے خلاف مزاحمت کے لیے سخت عمارتی ضابطوں کو نافذ کیا ہے۔ حکومت نے سرکاری عمارتوں کا جائزہ لینے، دوبارہ تعمیر کرنے کے لیے ایک مہم شروع کی تاکہ زوردار زلزلوں کو برداشت کرنے کی صلاحیت کو بڑھایا جا سکے، بعد یہ مہم نجی عمارتوں تک نافذ کر دی گئی ہے۔ علاوہ ازیں 21 ستمبر - 1999 میں مہلک زلزلہ کی تاریخ - اب تائیوان میں تباہی کی مشقوں کے لیے ایک مخصوص دن ہے۔ اس دن موبائل فونز پر فرضی الرٹ بھیجے جاتے ہیں اور اسکولوں میں انخلاء کی مشقیں کی جاتی ہیں۔ ہوالین کاؤنٹی کے میئر، وی چیا ین، اپنے شہر میں نسبتاً کم اموات کی وجہ جدید تیاری کو قرار دیتے ہیں جہاں ایک پرائمری اسکول کے جمنازیم کو زلزلے کے چند گھنٹوں بعد ہی پناہ گاہ میں تبدیل کردیا گیا۔ رہائشیوں کے لیے خیموں کی قطاریں لگائی گئی ہیں جن کے گھروں کو نقصان پہنچا ہے، یا جو آفٹر شاکس کی وجہ سے واپس آنے سے ڈر رہے ہیں۔

تائیوان کی محفوظ بلند ترین عمارت

تائیوان کی نیشنل فائر ایجنسی (این ایف اے) کے مطابق، تائیوان میں آنے والے 7.4 شدت کے مہلک زلزلے سے 770 عمارتوں کو نقصان پہنچا ہے۔ دارالحکومت تائی پے میں زلزلے کے مرکز سے صرف 80 میل دور عمارتیں بھی شدید لرز اٹھیں۔ لیکن جدید انجینئرنگ کا نمونہ، تائی پے 101، جو کبھی دنیا کی بلند ترین عمارت تھی، بغیر کسی نقصان کے ابھری۔ زلزلے کی فوٹیج سے ظاہر ہوتا ہے کہ 1,667 فٹ اونچا ٹاور تھوڑا سا جھوم رہا ہے، اس کی ساختی لچک زلزلے کی طاقتور حرکت کا مقابلہ کرنے میں مدد کر رہی ہے۔ اس حرکت نے یہ ظاہر کیا کہ تعمیر میں استعمال ہونے والا مضبوط کنکریٹ کس طرح زلزلوں کے خلاف سب سے اہم دفاع ہے۔ کنکریٹ اور اسٹیل کی طاقت کو ملا کرتیار کیا گیا تعمیراتی مواد عمارت کو ہلنے کے لیے کافی لچکدار بناتا ہے، اور یہ تیز ہواؤں اور تائیوان سے اکثر ٹکرانے والے طوفانوں کا مقابلہ کرنے کے لیے کافی مضبوط ہے۔ تاہم، ایک اور تکنیکی جدت 101 منزلہ فلک بوس عمارت کی حفاظت میں مدد کرتی ہے۔ ایک 660 ٹن کا کروی آلہ جسے ’ٹیونڈ ماس ڈیمپر‘ کہا جاتا ہے فلک بوس عمارت کی اوپری منزلوں میں دیوہیکل پینڈولم کی طرح جھولتا ہے۔ 87 ویں اور 92 ویں منزل کے درمیان 92 موٹی تاروں سے معلق، سنہری سٹیل کا دائرہ کسی بھی سمت میں تقریباً 5 فٹ حرکت کر سکتا ہے۔ نتیجے کے طور پر، یہ ایک پینڈولم کی طرح کام کرتا ہے جو جھومنے والی حرکتوں کا مقابلہ کرتا ہے (یا نم کرتا ہے)۔

فلک بوس عمارتوں پر مبنی ’سپرٹال‘کے مصنف، اسٹیفن ال نے وضاحت کی کہ یہ بنیادی طور پر ایک بہت بڑا کاؤنٹر ویٹ ہے۔ تائی پے 101 کے معاملے میں، یہ 660 ٹن ہے۔ یہ بھاری لگتا ہے، لیکن اگر آپ اس کا موازنہ عمارت کے مجموعی وزن سے کریں، تو یہ اس وزن کا صرف ایک حصہ ہے۔ جب کوئی عمارت ہلنا شروع ہوتی ہے تو ’ٹیونڈ ماس ڈیمپر‘ مخالف سمت میں حرکت کرے گا۔ تائی پے 101 کے معاملے میں، یہ معلق ہے… اس لیے یہ ٹاور کے جھکنے کے ساتھ پیچھے رہ جائے گا اور مخالف سمت میں حرکت کرتے ہوئے حرکی توانائی کو جذب کرے گا۔ ال نے وضاحت کرتے ہوئے کہا کہ گیند اور عمارت کے درمیان ہائیڈرولک سلنڈر اس توانائی کو حرارت میں تبدیل کرتے ہیں ، جو پھر منتشر ہو جاتا ہے۔ ٹیونڈ ماس ڈیمپرز دنیا بھر میں فلک بوس عمارتوں میں استعمال ہوتے ہیں۔ یہ آلہ 'ہارمونک وائبریشن' کی وجہ سے ہونے والی پرتشدد حرکت سے انتہائی حفاظت کرتا ہے، جو زلزلے کے دوران ساختی خرابی کا سبب بن سکتا ہے۔ یہ جو استحکام فراہم کرتے ہیں وہ تیز ہواؤں میں عمارت کے مکینوں پر ہلنے والے غیر آرام دہ یا متلی کرنے والے اثر کو بھی کم کر سکتا ہے۔

تائی پے 101 نامی عمارت 2004 سے 2007 تک دنیا کی سب سے اونچی عمارت تھی، جب اسے دبئی میں برج خلیفہ نے پیچھے چھوڑ دیا تھا۔ اس میں ایک آبزرویشن ڈیک ہے جہاں سے ٹیونڈ ماس ڈیمپر نظر آتا ہے اور یہ اب سیاحوں کی توجہ کا مرکز ہے، خاص طور پر جب یہ تیز ہواؤں کے دوران حرکت کرتا ہے۔ تاہم، بڑا کرہ واحد ڈیزائن فیچر نہیں ہے جو ایک بڑی فالٹ لائن کے قریب کھڑے ٹاور کو مستحکم کرنے میں مدد کرتا ہے۔ یہ فلک بوس عمارت غیر معمولی طور پر گہری بنیادوں پرتعمیر کی گئی ہے ۔ اس بنیاد کے اوپر عمارت کا مرکز میگا کالموں سے جڑا ہوا ہے ۔ یہ عمارت ہائی رائز اینٹی سیسمک بلڈنگ کوڈز کی تعمیل کرتی ہے جو اتنے ہی سخت ہیں جتنا کہ 'بحرالکاہل کے رنگ آف فائر' کے ساتھ واقع جزیرے پر توقع کی جا سکتی ہے، جو بحر الکاہل کے کناروں کے گرد چلتا ہے اور انڈونیشیا سے چلی تک بڑے پیمانے پر زلزلہ اور آتش فشاں کا سبب بنتا ہے۔