روس یوکرین جنگ عالمی مسئلہ، پوتن ثقافت کو تباہ کرنے کے درپے: بائیڈن

ٹوکیو/نئی دہلی: ریاستہائے متحدہ کے صدر جو بائیڈن نے کواڈ لیڈروں کے اجلاس کے افتتاح کے موقع پر منگل کو روس پر تنقید کرتے ہوئے کہا کہ روس-یوکرین جنگ صرف یورپی مسئلہ نہیں ہے، بلکہ یہ ایک عالمی مسئلہ ہے۔ روس اسکولوں اور عجائب گھروں پر حملہ کرکے ثقافت کو تباہ کرنے کی کوشش کر رہا ہے۔

انہوں نے کہا کہ یہ صرف ایک یورپی مسئلہ سے کہیں زیادہ ہے بلکہ یہ ایک عالمی مسئلہ ہے۔ انہوں نے کہا کہ جب آپ ٹیلی ویژن کو آن کرتے ہیں اور دیکھتے ہیں کہ روس وہاں کیا کر رہا ہے تو مجھے ایسا لگتا ہے کہ پوتن ایک ثقافت کو تباہ کرنے کی کوشش کر رہے ہیں۔ وہ نہ صرف فوجی تنصیبات پر حملہ کر رہا ہے بلکہ وہ اسکولوں، ثقافتی مراکز اور تاریخی عجائب گھروں پر بھی حملہ کر رہا ہے۔ انہوں نے یوکرین پر روسی حملے کو ہماری مشترکہ تاریخ کا سیاہ باب قرار دیا۔

جو بائیڈن نے کہا کہ ہم اپنے وقت کے تاریک ترین دور میں ہیں، یوکرین کے خلاف روس کی وحشیانہ اور بلا اشتعال جنگ نے انسانی تباہی مچا دی ہے اور بے گناہ شہری سڑکوں پر آنے پر مجبور ہو گئے ہیں۔ لاکھوں لوگ اپنے ہی ملک میں مہاجرین کی زندگی گزارنے کے لیے مجبور ہو چکے ہیں۔ امریکی صدر نے کہا کہ جب تک روس اس جنگ کو طول دے گاتب تک ہم اس جنگ میں حصہ دار بنے رہیں گے اور عالمی ردعمل کی قیادت کریں گے۔