'کواڈ' کا سمندری تحفظ پر زور، روس-یوکرین جنگ پر اظہار تشویش اور دہشت گردانہ حملوں کی مذمت

امریکہ میں ہفتہ کو کواڈ چوٹی کانفرنس کا انعقاد ہوا۔ اس میں ہندوستان، امریکہ، جاپان اور آسٹریلیا کے سربراہان نے شرکت کی۔ کانفرنس کے بعد رکن ممالک نے ایک مشترکہ بیان جاری کیا جس میں سمندری تحفظ کے شعبہ میں تعاون بڑھانے پر رضامندی ظاہر کی گئی۔ اس کے علاوہ انہوں نے شمالی کوریا کے میزائل لانچ اور کراس بارڈر دہشت گردی پر بھی تشویش کا اظہار کرتے ہوئے اس کی مذمت کی۔

کواڈ رہنماؤں نے مشترکہ بیان جاری کرتے ہوئے کہا "ہم اعلان کرتے ہیں کہ امریکی کوسٹ گارڈ، جاپانی کوسٹ گارڈ، آسٹریلیائی سرحدی فوج اور ہندوستانی کوسٹ گارڈ سمندری تحفظ کو آگے بڑھانے کے لیے 2025 میں پہلا کواڈ ایٹ سی شپ آبزرور مشن شروع کرنے کا منصوبہ بنا رہے ہیں اور مستقبل کے آنے والے برسوں میں انڈو-پیسفک میں آگے مشن جاری رکھیں گے"۔

کواڈ رہنماؤں نے کہا ہے کہ ہم سب مل کر تقریباً دو ارب لوگوں اور عالمی مجموعی گھریلو مصنوعات کی ایک تہائی سے زیادہ کی نمائندگی کرتے ہیں۔ ہم ایک آزاد اور کھلے انڈو-پیسفک کے لیے مضبوطی کے ساتھ پابند ہیں۔ ہم کسی بھی غیر مستحکم کرنے والی یا یکطرفہ کارروائی کی شدید مخالفت کرتے ہیں جو طاقت سے یا دباؤ سے موجودہ صورتحال کو بدلنے کی کوشش کرتی ہے۔

ہم اس علاقے میں حال میں غیر قانونی طور پر ہوئے میزائل لانچ کی مذمت کرتے ہیں جو اقوام متحدہ کی سلامتی کونسل کی قرار داد کی خلاف ورزی ہے۔ جنوب مشرق ایشیائی ممالک کی تنظیم (ASEAN)، پیسفک جزائر گروپ فورم (PIF)، اور بحر ہند رِم ایسو سی ایشن (IORA) سمیت علاقائی تنظیموں کی قیادت کا احترام کواڈ کے مرکز میں ہے اور رہے گا۔

کواڈ نے اپنے مشترکہ بیان میں آگے کہا کہ ہم اقوام متحدہ کی سلامتی کونسل کی کئی قرار داد کی خلاف ورزی کرنے والے شمالی کوریا کے بیلسٹک میزائل لانچ اور ایٹمی اسلحوں کو لے کر جاری اس کے کام کی مذمت کرتے ہیں۔ یہ لانچ عالمی امن اور استحکام کے لیے سنگین خطرہ پیدا کرتا ہے۔ ہم شمالی کوریا سے یو این ایس سی آر کے تحت اپنی سبھی ذمہ داریوں پر عمل کرنے، اُکساوے سے بچنے اور مثبت بات چیت میں شامل ہونے کی گزارش کرتے ہیں۔ ہم علاقے اور اس کے باہر شمالی کوریا سے متعلق نیوکلیئر اور میزائل ٹکنالوجی کے کسی بھی طرح کے پھیلاؤ کو روکنے کی ضرورت پر زور دیتے ہیں۔ کواڈ رہنماؤں نے کہا کہ ہم شمالی کوریا کے ذریعہ غیر قانونی اسلحوں اور بیلسٹ میزائل پروگرام کی فنڈ کرنے کے لیے نٹ ورک، سائبر ایکٹیویٹی اور غیر ملکوں میں مزدوروں کے استعمال پر اپنی شدید تشویش کا اظہار کرتے ہیں۔

بیان میں یوکرین جنگ پر بھی گہری تشویش کا اظہار کرتے ہوئے کہا گیا کہ جنگ شروع ہونے کے بعد سے ہم میں سے ہر ایک نے یوکرین کا دورہ کیا ہے اور اسے خود دیکھا ہے۔ ہم خودمختاری اور علاقائی سالمیت کے احترام سمیت اقوام متحدہ چارٹر کے مقاصد اور اصول اور عالمی قوانین کے مطابق ایک مستحکم امن کی ضرورت کو دہراتے ہیں۔

کواڈ نے کراس بارڈر سمیت سبھی شکلوں میں دہشت گردی اور پُرتشدد انتہاپسندی کی واضح طور سے مذمت کی۔ انوہں نے کہا کہ ہم ایسے دہشت گردانہ حملوں کے قصورواروں کے لیے جوابدہی کو بڑھاوا دینے پر مل کر کام کرنے کے لیے پابند ہیں۔ ہم پٹھان کوٹ اور ممبئی میں 26/11 کو ہوئے حملوں سمیت دہشت گردانہ حملوں کی مذمت کرتے ہیں۔