قطری عدالت میں ہندوستانی درخواست منظور، سزائے موت پانے والے نیوی کے 8 سابق افسران کو راحت کی امید

نئی دہلی: قطر کی عدالت سے 27 اکتوبر 2023 کو ہندوستانی بحریہ کے آٹھ سابق اہلکاروں سزائے موت سنائے جانے کے معاملہ میں اہم پیشرفت ہوئی ہے۔ ذرائع کے مطابق قطر کی عدالت نے سزائے موت پانے والے ہندوستانی بحریہ کے سابق افسران کی اپیل منظور کر لی ہے اور کیس کی اگلی سماعت جلد ہوگی۔ یہ اپیل حکومت ہند نے دائر کی تھی۔

قطر کی ایک عدالت نے جمعرات (23 نومبر) کو اپیل کی دستاویزات قبول کر لیں۔ ذرائع کے مطابق عدالت اپیل کا مطالعہ کر رہی ہے اور آئندہ سماعت جلد متوقع ہے۔ ہندوستان کی وزارت خارجہ کے ترجمان ارندم باگچی نے اپنی آخری ہفتہ وار بریفنگ میں کہا کہ ہندوستان اس فیصلے کے خلاف "پہلے ہی اپیل دائر کر چکا ہے"۔

گزشتہ سال 25 اکتوبر کو میتو بھارگوا نامی خاتون نے ٹویٹ کیا تھا کہ ہندوستانی بحریہ کے آٹھ سابق افسران 57 دنوں سے قطر کے دارالحکومت دوحہ میں غیر قانونی حراست میں ہیں۔ میتو بھارگوا کمانڈر پورنیندو تیواری کی بہن ہیں۔ ان افسران پر مبینہ طور پر اسرائیل کے لیے جاسوسی کا الزام ہے۔ قطر کی نیوز ویب سائٹ الجزیرہ کی رپورٹ کے مطابق ان افسران پر قطر کی آبدوز کے منصوبے سے متعلق معلومات اسرائیل کو دینے کا الزام ہے۔

تاہم قطر کی حکومت کی طرف سے حکومت ہند کو ان سابق افسران پر لگائے گئے الزامات کے بارے میں کوئی خاص معلومات شیئر نہیں کی گئی ہیں۔ بحریہ سے ریٹائر ہونے والے یہ تمام افسران دوحہ میں قائم الدہرہ کمپنی میں کام کرتے تھے۔ یہ کمپنی ٹیکنالوجی اور مشاورتی خدمات فراہم کرتی تھی، جس نے قطر کی بحریہ کو تربیت اور سامان بھی فراہم کیا۔

یہ کمپنی عمان کی فضائیہ سے ریٹائرڈ سکواڈرن لیڈر خامس العجمی چلا رہے تھے۔ پچھلے سال اسے بھی ان ہندوستانیوں کے ساتھ گرفتار کیا گیا تھا۔ تاہم اسے نومبر میں رہا کر دیا گیا۔

بحریہ کے جن آٹھ سابق افسروں کو موت کی سزا سنائی گئی ہے ان کے نام یہ ہیں- کیپٹن سوربھ وشیشتھا، کمانڈر پورنیندو تیواری، کیپٹن بیرندر کمار ورما، کمانڈر سوگناکر پکالا، کمانڈر سنجیو گپتا، کمانڈر امیت ناگپال اور راجیش۔ یہ تمام سابق افسران 20 سال تک ہندوستانی بحریہ میں خدمات انجام دے چکے تھے۔ بحریہ میں رہتے ہوئے ان کا دور بے داغ رہا ہے اور وہ اہم عہدوں پر فائز رہے ہیں۔