طیارہ حادثہ میں ’رافیل‘ بنانے والی کمپنی کے مالک اولیویر ڈسالٹ ہلاک

فرانس کی لیس ریپبلک (ایل آر) کنزرویٹیو پارٹی کے نائب اور ارب پتی صنعت کار سرج ڈسالٹ کے بیٹے اولیویر ڈسالٹ کی ہیلی کاپٹر حادثہ میں موت واقع ہو گئی ہے۔ وہ رافیل بنانے والی کمپنی ڈسالٹ ایوی ایشن کے مالک تھے۔ فرانسیسی صدر امینوئل میکرون نے ٹوئٹ کر ان کے انتقال کی خبر دی ہے۔

میکرون نے اتوار کو کیے گئے اپنے ٹوئٹ میں کہا کہ ’’اولیویر ڈسالٹ فرانس سے محبت کرتے تھے۔ وہ انڈسٹری کے کیپٹن، رکن پارلیمنٹ، مقامی منتخب افسر، فضائیہ میں ریزرو کمانڈر تھے۔ اپنی پوری زندگی میں انھوں نے ملک کی خدمت کی۔ ان کا اس طرح اچانک جانا ایک بہت بڑا خسارہ ہے۔‘‘

خبر رساں ایجنسی سنہوا کی رپورٹ کے مطابق 69 سالہ اولیویر ڈسالٹ کی موت اتوار کو شمالی فرانسیسی شہر ٹائکس میں ایک ہیلی کاپٹر حادثہ کے دوران ہو گئی۔ اس حادثہ میں پائلٹ کی بھی موت کی اطلاع دی گئی ہے۔

بہر حال، فوربس کے مطابق اولیویر ڈسالٹ کی ملکیت اندازے کے طور پر 6.3 بلین یورو (7.3 بلین ڈالر) کی تھی اور وہ دنیا کے سرفہرست امراء میں 361 ویں نمبر پر تھے۔ ڈسالٹ فیملی کا فرانس میں بہت بڑا کاروبار ہے۔ قابل ذکر ہے کہ ڈسالٹ گروپ ڈسالٹ ایوی ایشن کا مالک ہے، جو رافیل جنگی طیاروں کی مینوفیکچرنگ کرتا ہے۔ ساتھ ہی یہ لے فگارو اخبار کا بھی مالک ہے۔