روس میں بغاوت: پرائیویٹ ملٹری کمپنی ’ویگنر‘ کے اراکین روستوف کو چھوڑ کر فیلڈ کیمپوں کی طرف لوٹے

ماسکو: ویگنر گروپ کی پرائیویٹ ملٹری کمپنی (پی ایم سی) کے اراکین نے روس کے روستوف کو چھوڑ دیا ہے اور فیلڈ کیمپوں کی طرف جارہے ہیں روستوف کے علاقائی گورنر واسیلی گولوبیف نے یہ اطلاع دی ہے۔ آدھی رات کے کچھ دیر بعد انہوں نے ایک ٹیلی گرام میں کہا ’’پی ایم سی ویگنیر کا دستہ روستوف چھوڑ کر اپنے فیلڈ کیمپ میں جا رہا ہے۔

روسی خبر رساں ایجنسی اسپوتنک نے ہفتے کو دیر گئے اطلاع دی کہ ویگنر کے ارکان نے روستوو آن ڈان شہر میں روس کے جنوبی فوجی ہیڈکوارٹر کے علاقے کو چھوڑنا شروع کر دیا ہے اور شہر میں حالات پرسکون ہیں۔

قبل ازیں، بیلاروس کے صدر کے دفتر نے کہا کہ پی ایم سی ویگنر کے سربراہ یوگینی پریگوزین نے روس میں ویگنر فوجیوں کی نقل و حرکت کو روکنے، صورتحال کو پرسکون کرنے کی تجویز کو منظور کر لیا ہے۔ یہ تجویز بیلاروس کے صدر الیگزینڈر لوکاشینکو نے پیش کی تھی جسے پریگوزن نے منظور کر لیا۔ پریگوزن نے بعد میں معلومات کی تصدیق کرتے ہوئے کہا کہ ویگنر کے دستے اپنے فیلڈ کیمپوں میں واپس جا رہے ہیں۔