اغوا شدہ 150 سے زائد لوگوں کو طالبان نے پوچھ تاچھ کے بعد آزاد کیا

افغانستان میں اس وقت لوگوں کے درمیان خوف و دہشت کا ماحول ہے۔ کئی افراد ملک سے باہر نکلنے کے لیے کابل ائیرپورٹ پر جمع ہیں لیکن وہاں سے نکلنا مشکل ہو رہا ہے۔ اس درمیان 150 سے زائد لوگوں کو طالبان کے ذریعہ جبراً اٹھا لیے جانے کی خبریں سامنے آئی تھیں، لیکن اب بتایا جا رہا ہے کہ پوچھ تاچھ کے بعد سبھی کو آزاد کر دیا گیا ہے۔

میڈیا ذرائع سے موصول ہو رہی خبروں کے مطابق افغانستان کی راجدھانی کابل واقع حامد کرزئی انٹریشنل ایئرپورٹ کے نزدیک ہفتہ کی صبح ہندستانیوں سمیت 150 سے زائد لوگوں کو اغوا کر لیا گیا تھا جس کے بعد عالمی سطح پر کافی تشویش کا عالم دیکھنے کو مل رہا تھا۔ حالانکہ اس درمیان طالبان کے ترجمان احمداللہ واثق نے لوگوں کو اغوا کیے جانے یا جبراً اٹھائے جانے جیسی رپورٹ کی تردید کرتے ہوئے کہا تھا کہ ایسا کچھ بھی طالبان کے ذریعہ نہیں کیا گیا ہے۔

دراصل کابل کے ایک نیوز پورٹل نے قابل اعتماد ذرائع کے حوالے سے بتایا تھا کہ خواتین سمیت 150 لوگوں کو صبح کابل میں حامد کرزئی انٹرنیشنل ایئرپورٹ کے راستے میں اغوا کر لیا گیا ہے۔ ’کابل ناؤ‘ ویب سائٹ کی رپورٹ کے مطابق اغوا شدہ لوگوں میں کچھ افغانی شہری اور افغانی سکھ بھی شامل تھے، لیکن ان میں بیشتر ہندوستانی شہری تھے۔