میٹا کے نئے پلیٹ فارم ’تھریڈز‘ نے ٹوئٹر کو کیا بے چین! مسک نے دی قانونی کارروائی کی دھمکی

واشنگٹن: فیس بک کی پیرنٹ کمپنی میٹا کی جانب سے متعارف کرائے گئے نئے پلیٹ فارم 'تھریڈز' کی وجہ سے مائیکرو بلاگنگ کی مشہور ویب سائٹ ٹوئٹر کے مالکان میں بے چینی پائی جاتی ہے۔ الزام ہے کہ تھریڈز کو ٹوئٹر کی طرز پر ہی تیار کیا گیا ہے، لہذا ٹوئٹر نے قانونی کارروائی کی دھمکی دے ڈالی ہے۔ بی بی سی نے جمعہ کو یہ اطلاع دی۔

خیال رہے کہ تھریڈز کو بدھ کے روز لانچ کیا گیا ہے اور میٹا نے اسے ٹوئٹر کے متبادل کے طور پر پیش کیا ہے۔ ٹوئٹر کے باس ایلون مسک نے کہا کہ مقابلہ اپنی جگہ ہے لیکن دھوکہ دہی نہیں ہونی چاہئے۔ تاہم میٹا نے ان دعووں کی تردید کی کہ ٹوئٹر کے سابق ملازمین نے تھریڈز بنانے میں مدد کی ہے۔ میٹا کے مطابق نئے پلیٹ فارم سے 3 کروڑ سے زائد افراد جڑ چکے ہیں۔

بی بی سی کے مطابق، تھریڈز کا لُک اور فیل ٹوئٹر کی طرح ہے، اور نیوز فیڈ اور ری پوسٹنگ بھی کافی مانوس ہے۔ ٹوئٹر نے بدھ کے روز میٹا کے سی ای او مارک زکربرگ کو ایک خط لکھ کر تھریڈز بنانے کے لیے ٹوئٹر کے تجارتی رازوں اور دیگر دانشورانہ املاک کو جان بوجھ کر اور غیر قانونی طریقے سے استعمال کرنے کا الزام لگایا۔

ٹوئٹر نے الزام لگایا کہ میٹا نے اس کے متعدد سابق ملازمین کی خدمات حاصل کیں جن کو ٹوئٹر کے تجارتی راز اور دیگر خفیہ معلومات تک رسائی حاصل تھی اور انہوں نے میٹا کے لیے ’کاپی کیٹ‘ تھریڈز ایپ تیار کرنے میں مدد کی۔