فلسطین کے خلاف اسرائیلی حملوں سے علاقہ میں کشیدگی بڑھے گی: ابو رودینہ

رام اللہ: فلسطین کے صدر محمود عباس کے ترجمان نبیل ابو رودینہ نے خبردار کیا ہے کہ فلسطینیوں کے خلاف اسرائیل کے اقدامات سے پورے خطے میں کشیدگی بڑھے گی۔ اتوار کو مشرقی یروشلم کے پرانے شہر میں واقع دمشق گیٹ پر اسرائیل کے وزیر خارجہ یائر لاپڈ کے دورے کی مذمت کرتے ہوئے نبیل ابو رودینہ نے پیر کو ایک بیان میں کہا کہ یہ دورہ "غیر ذمہ دارانہ" تھا۔

ابو رودینہ نے کہا کہ 'اسرائیلی فوج اور پولیس کا رویہ اشتعال انگیز ہے۔' ترجمان نے مزید کہا کہ مشرقی یروشلم میں اسرائیل کی مسلسل بڑھتی جارحیت اور مسجد اقصیٰ پر اسرائیلی عوام کے حملے واضح اور صریح خلاف ورزیاں ہیں جو اسرائیل کی جانب سے دستخط شدہ معاہدوں کے بارے میں فہم و فراست اور عزم کی کمی کو ثابت کرتے ہیں۔

خبر رساں ایجنسی ژنہوا کی رپورٹ کے مطابق اتوار کی شام، فلسطینی ہلال احمر سوسائٹی نے ایک بیان میں کہا کہ اسرائیل کے وزیر خارجہ یائر لاپڈ کے دورے کے بعد مشرقی یروشلم میں دمشق گیٹ کے باہر جھڑپوں کے دوران اسرائیلی پولیس کے ہاتھوں 19 فلسطینی زخمی ہوئے۔

دراصل 1967 کی مشرق وسطیٰ کی جنگ میں اسرائیل نے مغربی کنارے، غزہ کی پٹی اور مشرقی یروشلم پر قبضہ کر لیا تھا۔ اس کے بعد سے فلسطینی 1967 کی سرحدوں پر ایک آزاد ریاست کے قیام کا مطالبہ کر رہے ہیں جس کا دارالحکومت مشرقی یروشلم ہو۔