سری لنکا بلاسٹ: آئی ایس نے چرچوں پر حملوں کی لی ذمہ داری، ہلاکتوں کی تعداد 321 ہوئی

نئی دہلی: سری لنکا میں ایسٹر سنڈے کے موقع پر ہوئے سلسلہ وار بم دھماکوں کی ذمہ داری بدنام زمانہ تنظیم آئی ایس آئی ایس نے قبول کر لی ہے۔ خبر رسیاں ایجنسی روئٹرز کے حوالہ سے بتایا گیا ہے کہ آئی ایس نے اپنی خبر رساں ایجنسی عمق کے ذریعہ سری لنکا میں ہونے والے دھماکوں کی ذمہ داری قبول کی ہے۔

واضح رہے کہ اتوار کے روز ہونے والے 8 سلسلہ وار دھماکوں نے سری لنکا کو دہلا کر رکھ دیا تھا۔ اس میں ہلاک ہونے والوں کی تعداد 321 تک پہنچ گئی ہے۔ وہیں دھماکوں میں جان گنوانے والے ہندوستانیوں کی تعداد بھی 10 ہو گئی ہے۔ ہلاک ہونے والے 10 ہندوستانیوں میں سے 6 جے ڈی ایس (جنتا دل سیکولر) کے رہنما ہیں جو بنگلورو میں انتخابات ہونے کے بعد چھٹی منانے کے لئے سری لنکا گئے تھے۔ سری لنکا میں ہلاک ہونے والے افراد میں 45 بیرون ملک کے لوگ شامل ہیں۔ سری لنکا میں منگل کے روز پارلیمان کا خصوصی اجلاس بلایا گیا، اس میں ہلاک شدگان کو خراج عقیدت پیش کی گئی اور آج ہی کے روز وہاں قومی غم بھی منایا جا رہا ہے۔

قبل ازیں سری لنکا کے وزارت دفاع کے سکریٹری نے ایک بڑا بیان دیا ہے جس میں انھوں نے کہا کہ ’’جو کچھ بھی سری لنکا میں ہوا اس کے پیچھے کرائسٹ چرچ میں مسلمانوں پر ہوئے حملہ کا نتیجہ ہے‘‘۔ ان کا کہنا ہے کہ شروعاتی جانچ میں یہ بات سامنے آئی ہے کہ کولمبو میں جو کچھ ہوا وہ اس غصہ کا اظہار ہے جو نیوزی لینڈ مساجد حملہ کے بعد پیدا ہوا۔ ادھر صدر میتری پالا سری سینا نے اعلان کیا ہے کہ وہ دوسرے ممالک سے بھی تعاون چاہتے ہیں کیوںکہ خفیہ رپورٹ میں مقامی دہشت گردوں کے ساتھ ہی بیرونی دہشت گردوں کے بھی ملوث ہونے کا انکشاف ہوا ہے۔

غور طلب ہے کہ مسیحی تہوار ایسٹر کے موقع پر سری لنکا کی راجدھانی کولمبو سمیت کئی شہروں میں سلسلہ وار 8 دھماکے ہوئے جن میں اب تک مرنے والوں کی تعداد 300 سے تجاوز کر گئی ہے۔ سری لنکائی حکومت نے یہ اعتراف کیا ہے کہ ان سے بڑی چوک ہوئی ہے کیونکہ حملے کے حوالہ سے خفیہ رپورٹ موصول ہو رہی تھی۔ سری لنکائی حکومت نے ابتدائی طور پر سری لنکا کی نامعلوم تنظیم ’نیشنل جماعت توحید‘ کو حملہ کا ذمہ دار قرار دیا تھا لیکن ساتھ ہی یہ بھی کہا تھا کہ بغیر بیرونی مدد کے اتنی چھوٹی سی تنظیم اتنی بڑی واردات انجام دینے کی قوت نہیں رکھتی۔