اسرائیل مسلمانوں کا دشمن، فلسطین کے حقوق کا دفاع لازم: خامنہ ای کا بیان

تہران: ایران کے سپریم لیڈر آیت اللہ خامنہ ای نے ایک بیان میں اسرائیل کو مسلمانوں کا مشترکہ دشمن قرار دیا اور فلسطین کے ساتھ یمن کی بھی حمایت پر زور دیا۔ خیال رہے کہ خامنہ ای تہران میں 5 سال بعد نماز جمعہ کے اجتماع سے خطاب کر رہے تھے۔

اپنے خطاب میں ایران کے رہبر اعلیٰ نے کہا کہ اسرائیل مسلمانوں کے حقوق پامال کر رہا ہے اور فلسطین کو اپنی زمین واپس لینے کا حق حاصل ہے۔ حزب اللہ کے سربراہ حسن نصراللہ کی موت کو ایک ناقابل تلافی نقصان قرار دیتے ہوئے، خامنہ ای نے عرب دنیا کو اس جنگ میں ایران کا ساتھ دینے کی دعوت دی۔

آیت اللہ خامنہ ای نے اپنے خطبے میں ملت اسلامیہ کے دشمنوں کو ایک ہی جگہ سے معلومات حاصل کرنے والا گروہ قرار دیا اور کہا کہ یہ دشمن مسلمانوں کے خلاف مشترکہ سازشیں کرتے ہیں۔ انہوں نے اسرائیل کی غزہ میں جاری خونریزی کی شدید مذمت کی اور فلسطینیوں پر ہونے والے مظالم کو ناقابل برداشت قرار دیا۔

انہوں نے کہا کہ افغانستان سے لے کر ایران، غزہ اور لبنان تک مسلمانوں کو اپنی خودمختاری کے دفاع کے لیے ایک متحدہ دفاعی لکیر بنانی ہوگی۔ انہوں نے کہا کہ سید حسن نصر اللہ کی شہادت عظیم نقصان ہے اور ان کے نظریات ملت کے لیے زندہ رہیں گے۔

انہوں نے مزید کہا کہ اسرائیل کے عزائم کو ناکام بنانے کے لیے تمام مسلمان ممالک کو متحد ہونا چاہیے اور دشمن کی سازشوں کو روکنا ہوگا۔ تہران کی گرینڈ مسجد میں نماز کے دوران ہزاروں افراد جمع ہوئے، جہاں حزب اللہ کے مقتول رہنما نصراللہ کے پوسٹرز دیکھے جا سکتے تھے۔ ان کے حق میں نعرے بازی بھی کی گئی۔

ایران کے خارجہ وزیر عباس عراقچی لبنان پہنچ چکے ہیں اور کہا جا رہا ہے کہ ان کی یہ دورہ لبنان کے حالات پر تبادلہ خیال کے لیے ہے۔ ایرانی طیارہ بیروت میں لینڈ کر چکا ہے اور وہاں حالات مزید کشیدہ ہوتے دکھائی دے رہے ہیں۔ اسرائیل کے حالیہ فضائی حملوں میں بیروت ایئرپورٹ کے قریب زبردست دھماکے ہوئے، جن کا نشانہ حزب اللہ کے اعلیٰ رہنما ہاشم صفی الدین کو بنایا گیا تھا۔