غزہ میں اسرائیلی ’قتل عام‘ کے خلاف ایران کی بین الاقوامی کارروائی کی اپیل

غزہ پر جاری اسرائیلی حملوں کے خلاف ایران نے عالمی برادری سے کارروائی کا مطالبہ کرتے ہوئے کہا ہے کہ وہ غزہ میں فلسطینیوں کے خلاف اسرائیلی کی ’نسل کشی‘ کو روکنے کے لیے اقدام کریں۔ ایران کی وزارت خارجہ کے ترجمان ناصر کنانی نے جمعرات کو سوشل میڈیا پلیٹ فارم ’ایکس‘ پر ایک پوسٹ کے ذریعے یہ اپیل کی ہے۔

ایرانی وزارت خارجہ کے ترجمان ناصر کنانی نے اپنی پوسٹ میں کہا ہے کہ ’’فلسطینیوں کے خلاف اسرائیل کی نسل کشی کی اب اقوام متحدہ کی انسانی حقوق کونسل (یو این ایچ آر سی) نے بھی تصدیق کر دی ہے۔ اب دنیا بھر کی حکومتوں اور بین الاقوامی اداروں کو اپنی ذمہ داریاں پوری کرنی ہوں گی۔‘‘

دریں اثنا غزہ میں قائم حماس کی وزارت صحت نے کہا ہے کہ گزشتہ سال 7 اکتوبر کو اسرائیل کی جانب سے حماس کے خلاف حملوں کے بعد سے غزہ کی پٹی میں 32,552 فلسطینی مارے گئے ہیں اور 74,980 سے زائد زخمی ہو چکے ہیں۔ وزارت صحت نے یہ معلومات ایک پریس ریلیز کے ذریعے دی ہے۔

خبر رساں ایجنسی شنہوا نے جمعرات کو رپورٹ کیا کہ اسرائیلی فورسز نے 24 گھنٹوں کے دوران 62 فلسطینیوں کو مار ڈالا جبکہ 91 کو زخمی کیا ہے۔ غزہ کی وزارت صحت کے مطابق اسرائیل اور حماس جنگ کے آغاز کے بعد سے غزہ کی پٹی میں ہلاکتوں کی کل تعداد 32,552 اور زخمی ہونے والوں کی تعداد 74,980 ہو گئی ہے۔