کانگو میں موسلادھار بارش نے لی 41 افراد کی جان، 4.3 لاکھ افراد متاثر

اقوام متحدہ: ڈیموکریٹک جمہوریہ كانگو میں موسلا دھار بارش سے مچی تباہی کی وجہ سے کم از کم 41 افراد کی جان چلی گئی اور تقریبا ًچار لاکھ تیس ہزار افرادابارش کے بعد سیلاب سے متاثر ہوئے ہیں،اقوام متحدہ کے ترجمان نے بدھ کو یہ اطلاع دی۔ اقوام متحدہ کے سکریٹری جنرل انتونیو گوٹریس کے ترجمان اسٹیفن ڈجارك نے کہا’’كانگو انسانی امور کے محکمہ نے بتایا کہ اکتوبر سے ہو رہی موسلادھار بارش کی وجہ سے دریائے اباگی طغیانی پر ہے جس سے تقریباً 430000 لوگ متاثر ہوئے ہیں‘‘۔

ترجمان نے کہا کہ اقوام متحدہ اور دیگر لوگوں کی امداد سے حکومت کی طرف سے متاثرہ افراد کو پناہ گاہ، پانی اور کھانے کی اشیا ءکو تقسیم کرنے کا منصوبہ بنایا گیاہے۔ انہوں نے کہا کہ اقوام متحدہ نے متاثرین کے خاندانوں کے تئیں تعزیت کا اظہار کیا ہے اور حکومت کی مدد کرنے کے لئے بھی تیار ہے۔