جی پی ایس جیمنگ حملہ: ہوا میں ٹکرا سکتے تھے درجنوں طیارے، جنوبی کوریا نے کم جونگ کو ٹھہرایا مورد الزام

شمالی کوریا کے سربراہ کم جونگ اُن پر جنوبی کوریا پر جی پی ایس جیمنگ حملہ کرانے کا الزام لگا ہے۔ جنوبی کوریا کا کہنا ہے کہ جی پی ایس حملہ سے کئی فوجی اور شہری طیاروں پر اثر پڑا ہے۔ شمالی کوریا پر جمعہ اور ہفتہ کو دو بار جی پی ایس سگنل میں خلل ڈالنے کا الزام لگایا گیا ہے۔ واضح ہو کہ گزشتہ کچھ وقت سے شمالی اور جنوبی کوریا کے درمیان کشیدگی میں لگاتار اضافہ ہو رہا ہے۔ اس سے پہلے بھی کم جونگ کچرے سے بھرے غبارے کو جنوبی کوریا میں چھوڑ چکے ہیں۔

جنوبی کوریا کے جوائنٹ چیف آف اسٹاف نے کہا کہ جمعہ اور ہفتہ کو مغربی سمندری ساحلی شہر کیسونگ اور ہیجو کے قریب جی پی ایس سگنل میں شمالی کوریا نے ہیرا پھیری کی ہے۔ شمالی کوریا کی اس حرکت سے درجنوں شہری طیاروں اور جہازوں کی پرواز میں خلل پڑا ہے اور اس دوران ان کے آپس میں ٹکرانے کا بھی خطرہ پیدا ہو گیا تھا۔ جنوبی کوریا نے اپنے مغربی سرحدی علاقے میں ہوائی جہازوں اور بحری جہازوں کو الرٹ رہنے کی وارننگ جاری کر دی ہے۔

قابل ذکر ہے کہ جی پی ایس سیٹلائٹس اور ریسیورز کے نیٹ ورک پر انحصار کرتا ہے جو عالمی پوزیشننگ اور نیویگیشن کی اجازت دیتا ہے۔ جے سی ایس نے شمالی کوریا سے فوری طور پر مداخلت روکنے کا مطالبہ کیا اور خبردار کیا کہ اسے اس کے اقدامات کے لیے جوابدہ ٹھہرایا جائے گا۔