کورونا کی زد میں آئیں برطانیہ کی وزیر صحت، خود کو گھر میں کیا قید!

برطانیہ کی وزیر صحت اور کنزرویٹو پارٹی کی رکن پارلیمنٹ نادِن ڈورس کے کورونا وائرس سے متاثر ہونے کی تصدیق ہوئی ہے۔ انھوں نے خود اس بات کی جانکاری دی۔ بی بی سی نے بدھ کو اپنی رپورٹ میں کہا کہ ڈورِس، کووڈ-19 سے متاثر ہونے والی ملک کی پہلی رکن پارلیمنٹ ہیں۔ انھوں نے کہا کہ جیسے ہی انھیں اس بات کی جانکاری ملی، انھوں نے سبھی احتیاطی قدم اٹھانا شروع کر دیا اور انھیں ان کی ہی رہائش میں تنہائی میں رکھا گیا ہے۔

اس بات کا انکشاف ایسے وقت میں ہوا ہے جب کووِڈ-19 سے متاثر ہونے کی وجہ سے ملک میں 6 اموات ہو چکی ہیں اور اب تک اس کے 382 معاملے سامنے آئے ہیں۔ تازہ ترین معاملے میں مرنے والا شخص 80 سال کے آس پاس کا تھا جس کی صحت اچھی نہیں تھی۔ اس درمیان ڈاکٹروں نے متنبہ کیا ہے کہ کورونا وائرس کے معاملوں کی تعداد بڑھنے کی حالت میں پہلے سے طے شدہ سرجری کے معاملوں کو روکنا پڑ سکتا ہے۔

برطانوی میڈیکل ایسو سی ایشن کا کہنا ہے کہ ڈاکٹروں کو سب سے بیمار مریضوں پر دھیان مرکوز کرنے کی ضرورت ہے، اس لیے شاید روٹین مانیٹرنگ لانگ ٹرم ہیلتھ کنڈیشن کو روکنا پڑ سکتا ہے۔ رکن پارلیمنٹ ڈورِس نے ایک بیان میں کہا کہ پبلک ہیلتھ انگلینڈ نے ان لوگوں کو ٹریس کرنا شروع کر دیا ہے جن کے ساتھ ان کا رابطہ رہا۔ ساتھ ہی محکمہ کی صلاح پر محکمہ اور ان کے پارلیمانی دفتر کو بند کر دیا گیا ہے۔