چین: جاسوس کتوں کی جگہ منشیات کا سراغ لگانے کے لیے 6 گلہریوں کی تربیت

بیجنگ: چین میں پولیس نے جاسوس کتوں کا سستا متبادل تلاش کیا ہے اور اس مقصد کے لیے چھے گلہریوں کو منشیات کا سراغ لگانے کی تربیت دی ہے۔ برطانوی اخبار دا ٹائمز نے خبردی ہے کہ چین کے جنوب مغربی شہر چانگ چنگ میں پولیس نے’’زیادہ چاق چوبند‘‘گلہریوں کی پہلی کھیپ کو تربیت دی ہے اور وہ منشیات کو سونگھ سکتی ہے۔

پولیس کے جاسوس کتوں کے مقامی اسکواڈ کے ٹرینر یِن جن کا کہنا ہے کہ گلہریوں کی سونگھنے کی حس زیادہ شدیدہوتی ہے لیکن ماضی میں ہمارے پاس سراغ رساں گلہریاں نہیں تھیں کیونکہ ہمارے پاس انھیں تربیت دینے کی پختہ تکنیک نہیں تھی۔ یِن جن کے مطابق سراغ رساں کتوں کو تربیت دینے کے لیے استعمال ہونے والے نظام نے مبیّنہ طور پر گلہریوں پر 'بہت اچھے اثرات' مرتب کیے ہیں۔

رپورٹ میں کہاگیا ہے کہ چونکہ گلہری کتوں کے مقابلے میں چھوٹی اور زیادہ لچکدار ہوتی ہے ، لہٰذا وہ پیکجوں اور تنگ کونوں، کھدروں ایسے’پیچیدہ ماحول‘ میں منشیات تلاش کرنے کے قابل ہیں اور وہ اونچی جگہوں تک بھی پہنچ سکتی ہیں۔ ایک مرتبہ جب مبیّنہ طورپر تربیت یافتہ گلہری کو منشیات کا پتاچلے گا،تووہ مشتبہ چیز کو کھرچ کر اپنے ٹرینر کو مطلع کرے گی۔

کسی ملک میں یہ پہلی بارنہیں ہورہا ہے کہ کتے کے علاوہ کسی دوسرے جانور کوغیر قانونی مواد کوسونگھنے کی تربیت دی گئی ہے۔ قبل ازیں 2013 میں ہالینڈ کی پولیس نے مبیّنہ طورپرچوہوں کو منشیات اور بارود کو سونگھنے کی تربیت دی تھی۔ان کی مشتبہ مواد کا سراغ لگانے میں کامیابی کی شرح 95 فی صد تھی۔

تاہم چین گلہریوں کو مشتبہ مواد کی تلاش کی تربیت دینے میں بازی لے گیا ہے اور اس کی یہ تازہ ترین کوشش ایک ایسے وقت میں سامنے آئی ہے جب وہ منشیات کے خلاف کوئی رورعایت نہ برتنے کی پالیسی کو مضبوط بنارہا ہے۔چین میں منشیات کے جرائم میں ملوّث افراد کواکثر موت سمیت سخت سزاؤں کا سامنا کرنا پڑتا ہے۔

(بشکریہ العربیہ ڈاٹ نیٹ)