برطانوی وزیر اعظم کے خلاف خاتون صحافی کا الزام

لندن: برطانوی وزیراعظم بورس جانسن پر ایک خاتون صحافی نے قابل اعتراض رویہ اختیار کرنے کا الزام عائد کیا ہے، جبکہ بورس جانسن نے اس الزام کی تردید کی ہے۔ اس سے قبل ایک امریکی ماڈل اور صنعت کار جنیفر ارکوری کے ساتھ بھی بورس جانسن پر لندن میں اس وقت قابل اعتراض رویہ اختیار کرنے کے الزامات عائد کیے گئے تھے جب وہ وہاں کے میئر تھے۔

ذرائع کے مطابق وزیر اعظم بورس جانسن پر نیا الزام صحافی شالورٹ ایڈورڈیس نے لگایا ہے۔ انہوں نے ’سنڈے ٹائمز‘ کے لئے ایک کالم میں لکھا ہے کہ جانسن نے 1999 میں ایک پارٹی میں ان کے ساتھ قابلِ اعتراض سلوک کیا تھا۔ خاتون صحافی نے بتایا کہ بورس جانسن اس وقت میگزین ’اسپیکٹیٹر‘ کی ایڈیٹنگ کر رہے تھے۔ برطانوی وزیراعظم بورس جانسن سے جب اس الزام کے بارے میں پوچھا گیا تو انہوں نے صاف انکار کر دیا۔

یہ الزامات ایسے وقت میں عائد کیے گئے ہیں جبکہ بورس جانسن کی کنزرویٹیو پارٹی کی سالانہ کانفرنس جاری ہے اور پارٹی 31 اکتوبر کو یورپی یونین سے برطانیہ کے باضابطہ طور پر علیحدہ ہونے پر غور کر رہی ہے۔

صحافی شالورٹ ایڈورڈیس نے مزید کہا کہ پروگرام کے بعد انہوں نے ایک خاتون سے اس بارے میں بات چیت کی اور اس خاتون کا بھی یہی کہنا تھا کہ بورس جانسن نے ان کے ساتھ بھی ویسا ہی سلوک کیا تھا۔ اس الزام پر وزیر اعظم ہاؤس کے دفتر نے ایک مختصر بیان بھی جاری کیا، جس میں بتایا گیا ہے کہ لگائے جانے والے الزام میں کوئی سچائی نہیں ہے، تاہم خاتون صحافی اپنی بات پر جمی ہوئی ہیں۔