ٹرمپ کے استقبال میں کروڑوں خرچ اور منندر کی لاش لانے کے لئے چندہ!

امریکی شہر لاس اینجلس میں ایک 31 سالہ ہندوستانی منندر سنگھ ساہی کو ایک دوکان پر نقاب پوش نے گولی مار کر قتل کر دیا۔ کرنال کا رہنے والا منندر سنگھ گزشتہ ماہ ہی 31 سال کا ہوا ہے اور اس کے دو بچے ہیں جن کی عمر پانچ اور نو سال ہے۔ منندر سنگھ کو امریکہ گٓئے ہوئے چھ ماہ کا وقت بھی نہیں ہوا ہے اور گھر کے تمام اخراجات کا بوجھ اس پر ہی ہے۔ اس کے قتل کیے جانے سے اس کے گھر پر زبردست آفت آ گئی ہے۔

ہندوستان کا پورا میڈیا امریکی صدر کے استقبال کی خبروں کو دکھانے میں لگا ہوا ہے۔ وہ یہ دکھانے میں مصروف ہے کہ صدر ٹرمپ کا کتنے لوگ استقبال کریں گے، ان کے لئے کون کھانا بنائے گا اور ان کے ساتھ کون کون آ یا ہے لیکن اس کے پاس منندر سنگھ کی خبر دکھانے کا وقت نہیں ہے، جس کی لاش کو ہندوستان واپس لانے کے لئے وہاں ایک پیج بنایا گیا ہے جس میں چندہ کیا جا رہا ہے۔

منندر سنگھ کیلیفورنیا کے لاس اینجلس کی 7 گروسری اسٹور میں کام کرتا تھا اور یہاں سے کما کر وہ اپنی بیوی بچوں کے لئے پیسہ بھیجا کرتا تھا۔ پولیس کے مطابق یہ واقعہ ہفتہ کی صبح پونے چھ بجے پیش آیا۔ شروعاتی جانچ سے اندازہ ہو رہا ہے کہ نقاب پوش نے چوری کی غرض سے دوکان پر حملہ کیا تھا۔ پولیس نے مشکوک کی تصویر بھی جاری کی ہے۔ اس موقع پر دوکان کے اندر دو اور گراہک تھے، وہ بھی اس حملے میں زخمی ہو گئے ہیں۔ اب منندر سنگھ کے جسد خاکی کو ہندوستان لانے کے لئے وہاں چندہ کیا جا رہا ہے۔