پولس محکمہ کو 45 ہزار بار فون کرنے والا شخص گرفتار

استنبول: ترکی سے ایک دلچسپ خبر آئی ہے جس میں پولس نے ایک ایسے شخص کو گرفتار کیا ہے جو روزانہ پولس کو سیکڑوں مرتبہ فون کرتا تھا اور پورے سال اس نے 45 ہزار 210 بار محکمہ کو فون کر کے پریشان کیا اور ان کا وقت ضائع کیا۔

55 سالہ شرف جان استنبول کے قریبی ضلع بہرام پاشا کا رہائشی ہے اور ایک عرصے سے تنہا رہ رہا ہے۔ اس پر الزام ہے کہ اس نے ایک دن میں کم ازکم 100 مرتبہ پولس کو فون کیا اور 15 مئی 2017 سے 15 مئی 2018 تک مسلسل ایک ہی نمبر سے 45 ہزار سے زائد مرتبہ پولس کو فون کیا اور نہ کوئی مدد طلب کی اور نہ ہی کسی قسم کی کوئی شکایت کی۔ شکایت درج کرانے کی بجائے وہ لائن پر موجود افسر سے باتیں کرنے لگ جاتا اور گفتگو کو طول دینا اس کا معمول تھا۔ بار بار اس رویہ کے بعد پولس نے اس شخص کو فضول کال کرنے والا عادی شخص قرار دیا۔

اس کے بعد بھی یہ سلسلہ نہ رکا اور پولس نے کمیونی کیشن ڈپارٹمنٹ کو اس شخص کی شکایت درج کرا دی۔ ادارے نے تصدیق کی کہ شرف جان نے پولس ایمرجنسی کے 115 نمبر پر ہزاروں مرتبہ کال کی ہے اور اس پر سرکار کے کام میں مداخلت کا الزام لگایا گیا ہے۔ اب اس شخص پر استنبول کی عدالت میں مقدمہ چلایا جارہا ہے اور اسے پانچ برس کی سزا ہوسکتی ہے۔

دوسری جانب ملزم شرف کا کہنا ہے کہ اس نے تنہائی سے تنگ آکر پولس کو بار بار فون کیا جس کے لیے وہ معذرت خواہ ہے۔ اس نے بتایا کہ دو سال قبل طلاق کے بعد اس کی بیوی اسے چھوڑ کر چلی گئی ہے اور وہ شراب نوشی کا عادی ہوچکا ہے، وہ ذہنی تناؤ سے بچنے کےلیے کال کرتا ہے۔ شرف جان نے اپیل کی ہے کہ اگر اسے بری کردیا جائے تو وہ آئندہ ایسی حرکت نہیں کرے گا۔